ჩვენი საიტი რუბრიკა "რეტროსპექტივას" მორიგ გამოშვებას გთავაზობთ - დღეს ევროპის საკლუბო ტურნირებში ზესტაფონელთათვის სადღეისოდ ბოლო ასპარეზობის შესახებ მოგითხრობთ - 2014 წლის 17 და 24 ივლისს ევროპალიგის 2014-2015 წლის გათამაშების მეორე საკვალიფიკაციო რაუნდში იმერლებმა სლოვაკური ტრნავის "სპარტაკის" წინააღმდეგ ორი მატჩი გამართეს.
გეტყვით იმასაც, რომ ამ მეტად საინტერესო მატჩების თანმხლები ამბების აღწერის პარალელურად, საფეხბურთო კლუბ "ზესტაფონის" პრეს-სამსახური ამ შეხვედრების საგანგებოდ მომზადებულ სრულ ვიდეოჩანაწერებსაც გთავაზობთ...
თავიდან გვინდა შემოგთავაზოთ სპორტული გამოცემა "მსოფლიო სპორტის" პუბლიკაციას, რომელიც ზესტაფონელთა და ტრნაველთა პირველ დაპირისპირებას ეძღვნება: "იმერული კლუბის ქომაგებს სლოვაკურ საკლუბო ფეხბურთთან კარგი მოსაგონარი აკავშირებდათ. რამდენიმე წლის წინ ზესტაფონელთა სათამაშო არენაზე ფეროელებმა უშანსოდ დატოვეს სლოვაკური ბანსკა-ბისტრიცას “დუკლა”. მაშინ, ზესტაფონელებმა მეტოქე 3:0 გაანადგურეს და მეორე მატჩში მინიმალური მარცხის მიუხედავად, უპრობლემოდ გადალახეს ევროპის ლიგის საკვალიფიკაციო ეტაპი.
იმერლებისა და ტრნავას "სპარტაკს" შორის ზესტაფონში გამართული პირველი შეხვედრა ერთი შეხედვით სტუმართა აქტიურობით კი დაიწყო, მაგრამ ფაქტია, რომ სლოვაკები მეორე წუთზე აშკარა გოლს გადაურჩნენ. შეტევის მარცხენა ფლანგიდან გეწაძის ჩაწოდების შემდეგ, სლოვაკ მცველებს დასწრებაზე ჯაბა დვალმა აჯობა, რომლის თავურის შემდეგ ბურთი ტრნაველთა კარის მარჯვენა ძელმა აისხლიტა.
სულ მალე ისევ ზესტაფონელთა სწრაფი იერიშის შედეგად კვლავ დვალს მიეცა თავის გამოჩენის შანსი, მაგრამ ზესტაფონელთა ფორვარდის დარტყმა მოწინააღმდეგის მცველს შეეხო და ბურთი კუთხურზე გადავიდა. ამ კომბინაციაში დვალთან ერთად დოლიძე და გეწაძე მონაწილეობდნენ.
სტუმართა მთავარმა მწვრთნელმა იურაი იარაბეკმა საკუთარი გუნდი 4-2-3-1 სათამაშო ტაქტიკით განალაგა. აქვე უნდა ვთქვათ ისიც, რომ თვალშისაცემი გახლდათ სლოვაკთა ათლეტურობა. დაცვაში სლოვაკთა დამრიგებელმა ადგილი იანეჩკა-ბორტელი-ტოტი-ჩონკას ოთხეული განამწესა. საყრდენებად იარაბეკმა საბო და კუზმა დააყენა, მათ წინ კი ჰოვანეცი-ვლასკო-შრანცის ტრიო მოქმედებდა, რომლებიც ცდილობდნენ პასებით მოემარაგებინათ წინ ეულად მდგომი მიკოვიჩი.
ტრადიციული 4-4-2 ტაქტიკით არჩია თამაში ზესტაფონელთა გამოცდილმა დამრიგებელმა გია გეგუჩაძემ. ფეროელთა დაცვა ღონღაძე-რენე ფერეირა-ჭელიძე-გიორგი გურულის კვარტეტისაგან შედგებოდა. ნახევარდაცვაში დოლიძე-შარიქაძე-კუხიანიძე-გეწაძის ოთხეული მოქმედებდა. თავდასხმაში ფორვარდებად გეგუჩაძეს დვალი-გელაშვილის დუეტი ჰყავდა გამწესებული.
სადებიუტო სახიფათო მომენტების შემდეგ რამდენიმე შემთხვევაში შეუთანხმებლად იმოქმედეს მასპინძელთა დაცვის წევრებმა. მართალია, რაიმე განსაკუთრებული ამ დროს ზესტაფონელთა კართან არ შექმნილა, მაგრამ ეს სიტუაციები მაინც გარკვეულწილად საგანგაშო გახლდათ. მე-19 წუთზე სახიფათო მომენტი ისევ სლოვაკთა კართან შეიქმნა, როდესაც დოლიძემ საჯარიმოს მისადგომებიდან მოჭრილი დარტყმა გაგზავნა მეტოქის კარისაკენ, მაგრამ ქართველი ნახევარმცველის დარტყმული სტუმართა კიპერმა რუსოვმა ეფექტურ ნახტომში კუთხურზე გადააგდო. მიუხედავად ამ ხიფათისა, ალბათ მოცემულ მომენტში უპრიანი იქნებოდა დოლიძეს პასი საჯარიმოში შეჭრილი დვალისათვის შეეყოლებინა.
ამ მომენტის შემდეგ თამაში ერთგვარად ერთფეროვანი გახდა. რამდენიმეჯერ სლოვაკებმა სწრაფი იერიშები განახორციელეს, რომლებიც კარში დარტყმით დასრულდა, თუმცა ვერ ვიტყვით იმას, რომ ზესტაფონელთა კარის დარაჯი ბოიან პავლოვიჩი რომელიმე მომენტის დროს სლოვაკებმა სერიოზულად შეაწუხეს. თავის მხრივ პირველი ტაიმის ეპილოგშ მაინცდამაინც თავი არც მასპინძლებს გამოუდევთ და შეხვედრის საწყისი 45 წუთი უგოლოდ, ფრედ 0:0 დასრულდა.
თამაშის მეორე ნახევარი მასპინძელთა უპირატესობით დაიწყო. ფეროელებმა პრესინგი მოუწყვეს მეტოქეს. 47-ე წუთზე “დავით აბაშიძეზე” ძაბვის ვარდნა მოხდა და დაახლოებით ორი წუთის განმავლობაში ყაზახმა არბიტრმა მატჩის მიმდინარეობა შეწყვიტა. მატჩის განახლებისთანავე სახიფათო მომენტი უკვე სტუმრებმა შექმნეს. შეტევის მარცხენა ფლანგზე ოსტატურად ითამაშა ჩონკამ, რომელიც ორ ქართველ მეურვეს გაექცა და ბურთი კარგ დასარტყმელ მდგომარეობაში მყოფ საბოს გადააწოდა. ფეროელთა იღბლად სლოვაკის დარტყმული არაზუსტი გამოდგა. ცოტა ხანში მოედნის ცენტრში შეცდა გიორგი გურული და სლოვაკებმა პავლოვიჩთან პირისპირ ვლასკო გაიყვანეს, რომელსაც საბოს მსგავსად დარტყმა არ გამოუვიდა და სახიფათო სიტუაციაც იოლად განიმუხტა.
თავის მხრივ ამუშავდა ზესტაფონელთა შეტევის მარჯვენა ფლანგი. ზედიზედ ორჯერ სახიფათო გარღვევა ჩაწოდებით დაასრულა დოლიძემ, თუმცა სამწუხაროდ ზესტაფონელთა ფორვარდთაგან ვერცერთმა ვერ შეძლო ამ მომენტზე გამოხმაურება, არადა ორივე შემთხვევაში შეიძლებოდა ტრნაველთა კართან ხიფათის შექმნა. 66-ე წუთზე ისევ მარჯვენა ფლანგიდან დაემუქრნენ ზესტაფონელები მეტოქის კარს. გუნდის კაპიტნის თემურ ღონღაძის ჩაწოდებულზე დვალი თამაშობდა მაღალ ნახტომში თავით, მაგრამ ბურთმა მცირე მანძილით გადაუარა ხარიხას. ცოტა ხანში ზესტაფონელთა კუთხურისას თავგანწირვით ითამაშა გურულმა, რომელმაც თავით დაასწრო მეურვეებს და სლოვაკთა მეკარის ბაქნის გასწვრივ ჩააგდო ბურთი, მაგრამ გურულიც მცდელობას ვერცერთი მისი თანაგუნდელი ვერ გამოეხმაურა.
მეორე ტაიმის შუა ნაწილში ორივე გუნდის მწვრთნელმა შეცვლებს მიმართა, თუმცა ვერ ვიტყვით, რომ ამ ცვლილებებმა რომელიმე გუნდში რაიმე ტაქტიკური ცვლილება მოახდინა. რაც დრო გადიოდა ორივე გუნდს მეტი სიფრთხილე ეტყობოდა. ბუნებრივია, არცერთს არ სურდა გოლის გაშვება, რათა განმეორებითი მატჩის წინ არასასურველ მდგომარეობაში არ მოხვედრილიყო. 85-ე წუთზე ზესტაფონელებს შეეძლოთ კარგი შეტევა განეხორციელებინათ, როდესაც შარიქაძის დიდებული გადაცემის შემდეგ დოლიძე შეტევის მარჯვენა ფლანგიდან ხელსაყრელ მდგომარეობაში აღმოჩნდა, მაგრამ იმერთა ნახევარმცველმა არასწორი გადაწყვეტილება მიიღო და ჩაწოდების ნაცვლად კარში დარტყმა გადაწყვიტა. ეს კი მეტისმეტად არაზუსტად გამოუვიდა.
თამაშის ეპილოგი შედარებით დუნედ ჩატარდა. სლოვაკები აშკარად ნულოვანი ფრეს შენარჩუნებას ცდილობდნენ. ბუნებრივია, მასპინძლებს სურდათ გოლის გატანა და სლოვაკეთში მინიმალური უპირატესობით გამგზავრება, მაგრამ ისინი შეტევაში გასაგები მიზეზების გამო უკანმოუხედავად ვერ მიდიოდნენ. შესაბამისად, სახიფათო მომენტების მხრივ შეხვედრის ეს ნაწილი მწირი გამდგა და ყაზახი არბიტრის საფინალო სასტვენმა ნულოვანი ფრე დააფიქსირა"...
ტრნაველთა და ზესტაფონელთა განმეორებითი მატჩი 2014 წლის 24 ივლისს ქალაქ ზლატე მორავცეს სტადიონ "ვიონზე" გაიმართა. მატჩი სტუმართათვის ძალიან მძიმედ დაიწყო - უკვე 4-ე წუთზე "სპარტაკი" გუნდის კაპიტანმა მარეკ იანეჩკამ დააწინაურა. მანვე პირველი ტაიმის მიწურულს (43-ე წუთი) უძლიერესი დარტყმით კიდევ ერთხელ აიღო ბოიან პავლოვიჩის კარი და მასპინძელთა უპირატესობა კიდევ უფრო თვალსაჩინო გახადა.
შეხვედრის მეორე ნახევარში ზესტაფონელები ოდნავ გააქტიურდნენ და შეეცადნენ თამაშში გარდატეხის შეტანა. თავის მხრივ, მასპინძლებმა უკან დაიხიეს და ბურთი სტუმრებს დაუთმეს, თავად კი თამაში სწრაფ კონტრშეტევებზე ააგეს. "სპარტაკის" ასეთმა ტაქტიკამ გაამართლა და 59-ე წუთზე, მას შემდეგ რაც მატჩის თურქმა არბიტრმა რენე ფერეირას მხრიდან საკუთარ საჯარიმოში ხელით თამაშისთვის "ზესტაფონის" კარში პენალტი დანიშნა, ერიკ საბომ ანგარიში სამამდე გაზარდა.
დარჩენილ დროში გოლი აღარ გასულა. მასპინძელთა გამარჯვება დიდი ანგარიშით 3-0. "ზესტაფონმა" კი ევროარენაზე ასპარეზობა ნაადრევად დაასრულა...
