ჩვენი გუნდი სეზონის განახლებისათვის მზადებას განაგრძობს. 19 აგვისტოს "ზესტაფონმა" კიდევ ერთი, რიგით მეხუთე ამხანაგური დაპირისპირება გამართა - ზესტაფონის საფეხბურთო ბაზაზე მარგველებს ეროვნული ჩემპიონატის რეგიონლიგის წარმომადგენელი ტყიბულის "მეშახტეს" მეორე გუნდი ესტუმრა.
შეხვედრა უფრო მაღალ დივიზიონში მოასპარეზე ზესტაფონელების სათამაშო უპირატესობით წარიმართა და პირველი ტაიმის შუაწელს ზურაბ ქვაჩახიას მიერ გატანილი ერთადერთი გოლის წყალობით შეხვედრის პირველი ნახევარი სწორედ ზესტაფონელებმა მოიგეს - 1:0.
მეორე ნახევარიც სანახაობრივად და საინტერესოდ წარიმართა. ტაიმის დაწყებიდან სულ მცირე ხანში "ზესტაფონი" ორი ბურთის სხვაობით დაწინაურდა - ზუსტი დარტყმით თავი სლავა პაპავამ გამოიჩინა. მასპინძლებს ამის შემდეგაც შეექმნათ რამდენიმე სახიფათო მომენტი, თუმცა ძალიან დამაჯერებლად გამოიყურებოდა ტყიბულელთა ახალგაზრდა გოლკიპერი ზაზა სოფრომაძე.
როგორც ეს ფეხბურთში ხშირად ხდება, მასპინძლები მომენტების განიავების გამო მატჩის დასასრულს ისევ დაისაჯნენ - "მეშახტე-2"-ს შეტევა მატჩის მიწურულს ზუსტი დარტყმით ნიკა ბებიამ დააგვირგვინა და დღევანდელი მატჩის საბოლოო ანგარიშიც დააფიქსირა - 2:1.
