მიმდინარე წლის 12 აგვისტოს "ზესტაფონმა", რომელიც სეზონის განახლებისათვის ემზადება, მორიგი, რიგით მესამე ამხანაგური შეხვედრა გამართა - ზესტაფონის საფეხბურთო ბაზაზე მარგველებმა ეროვნული ჩემპიონატის ლიგა 3-ის ერთ-ერთ ლიდერ, მარტვილის "მერანს" უმასპინძლეს.
მატჩის პირველი ნახევარი თანაბარ ბრძოლაში გაილია - მართალია, მე-19 წუთზე ანგარიშის გახსნა მარტვილელმა ბაქარ ლაღაძემ მოახერხა, თუმცა 35-ე წუთზე ზესტაფონელმა ტარიელ ბურჯანაძემ ზუსტი თავურით გაათანაბრა და ტაიმიც ფრედ 1:1 დასრულდა.
მეორე ნახევარიც მთლიანობაში თანაბარ ბრძოლაში წარიმართა, თუმცა მატჩის დასკვნით ნაწილში დაცვის ხაზში თამაშისას მასპინძელთა შეცდომებით კარგად ისარგებლეს სტუმრებმა და გივი ხეცურიანისა და ჯავახირ ესანკულოვის გოლების წყალობით დღევანდელ დაპირისპირებაში გამარჯვების მოპოვებაც მოახერხეს - 1:3.
