16.05.2024

ზუსტად 16 წლის წინ მოგებული ეროვნული თასი

ზესტაფონელთა კაპიტანი როინ ონიანი თასით ხელში

დღეს "ზესტაფონისათვის" ისტორიული დღეა - ზუსტად 16 წლის წინ, 2008 წლის 16 მაისს დავით ყიფიანის სახელობის ეროვნული თასის გათამაშების ფინალურ შეხვედრაში საფეხბურთო კლუბმა ”ზესტაფონმა” თბილისის "ამერი” ანგარიშით 2-1 დაამარცხა და საკუთარ ისტორიაში პირველად თასის მფლობელის საპატიო ტიტულს დაეუფლა.

გთავაზობთ ამ მატჩისადმი მიძღვნილ, სპორტულ გამოცემა "მსოფლიო სპორტში" მატჩის მეორე დღეს გამოქვეყნებულ პუბლიკაციას ...

"საქართველოს დავით ყიფიანის თასის ყაზბეგის გათამაშების ფინალში, “ზესტაფონმა” “ამერი” 2:1 დაამარცხა და ზედიზედ მე-4 ცდიდან თასის მფლობელი გახდა. 2005 წლის ფინალში, ზესტაფონელები თბილისის “ლოკომოტივთან” 0:2, მერე კი ორჯერ ზედიზედ, ჯერ თერთმეტმეტრიანის სერიებში, მერე კი 0:1 “ამერთან” დამარცხდნენ და ახლა რევანში იმდენად სწყუროდათ, რომ თითქმის მთელი შეხვედრის მანძილზე დომინირებდნენ და გამარჯვებაც დამსახურებულად მოიპოვეს, რის შედეგადაც მინიმუმ ერთი წლით, ახალი თასის მფლობელები გახდნენ.

“ბორის პაიჭაძის” სტადიონზე შეკრებილი 20 000 მაყურებლიდან, დაახლოებით 3/4 “ზესტაფონს” გულშემატკივრობდა და იმერელმა ფეხბურთელებმაც შეხვედრა აქტიურად დაიწყეს. მათ მე-2 წუთზევე შეეძლოთ ანგარიშის გახსნა, თუმცა ნიკა კვასხვაძის მარჯვენა ფლანგიდან ჩაწოდებულს, ბექა გოცირიძე ვარდნაში ვერ შეწვდა, ვიეირას უხეიროდ დარტყმული კი კარს გადასცდა. პირველმა ტაიმმა, პრაქტიკულად “ამერელთა” ნახევარზე ჩაიარა, მაგრამ საგოლე დარტყმამდე საქმე არ მიდიოდა.

ვერ ვიტყვით, რომ ამაში წვლილი “ამერის” ფეხბურთელებს მიუძღვოდათ, რადგანაც მათი დაცვა და მეკარე, არადამაჯერებლად თამაშობდა. ერთი-ორჯერ, ნადირაშვილი ისე არადამაჯერებლად გამოვიდა კარიდან, რომ ზესტაფონელ ფეხბურთელებს მეტი სიჩაუქე რომ გამოეჩინათ, გოლი პირველ ტაიმშივე გავიდოდა, თუმცა “ამერელთა” მეკარის შეცდომით, “ზესტაფონმა” 2-ჯერ მაინც იხეირა, ოღონდ მე-2 ტაიმში.

57-ე წუთზე, ვიეირამ მარცხენა ფლანგიდან ბურთი შორეულ ძელთან ჩააწოდა, თბილისელთა მეკარემ და მცველებმა კი როინ ონიანი ვერ შეაჩერეს და პრაქტიკულად კარის ხაზიდან გაატანინეს. 5 წუთში “ამერის” მცველები და მეკარე კიდევ ერთხელ, თითქმის ანალოგიურ სიტუაციაში შეცდნენ. ხიდეშელმა მარჯვენა ფლანგიდან ჯარიმა შორეულ ძელთან ჩააწოდა, ნადირაშვილი კარიდან უხეიროდ გამოვიდა, ედიკ საჯაიამ მას ბურთი თავით თავზე გადაავლო, ზედ კარის ხაზიდან კი ბექა გოცირიძემ ის ფეხით კარის ბადეში გაახვია.

ასეთ სიტუაციაში გიორგი ჩიხრაძე ვა-ბანკზე წავიდა და 2 წუთის წინ შეცვლაზე შესულ ალავიძეს, ტატანაშვილიც მიაშველა. ამან თბილისელთა თამაში აშკარად გამოაცოცხლა და მიუხედავად “ზესტაფონის” მწვავე კონტრშეტევებისა, უპირატესობას უკვე “ამერის” ფეხბურთელები დაეუფლნენ. 76-ე წუთზე ონიანს მათი მონდომების ჩაცხრობა შეეძლო, მაგრამ მისი ცხრიანში დარტყმულის მოგერიება “ამერის” მოკარემ ნახტომში მოახერხა...

ამასობაში 89-ე წუთი დადგა და შეხვედრის ბოლო წუთებმა ინტრიგა შეინარჩუნა. შეცვლაზე შესულმა ალავიძემ, მარცხენა ფლანგიდან ბურთი საჯარიმოში მყოფ, ასევე შეცვლაზე შესულ ტატანაშვილს თავზე დაასვა და მანაც როინ კვასხვაძეს აუღებელი დაურტყა. თბილისელებმა გასათანაბრებლად კი გაიბრძოლეს, მაგრამ მეტი ვეღარ მოახერხეს, თუმცა მათ რომ თავიანთი ბედი თავიდანვე შეტევაში ეძიათ, ახლა შესაძლოა თასის სამგზის მფლობელები ყოფილიყვნენ.

გამარჯვებულ “ზესტაფონს” მედლები და თასი საქართველოს ფეხბურთის ფედერაციის პრეზიდენტმა ნოდარ ახალკაცმა და სფფ-ს ვიცე პრეზიდენტმა და პროფესიული ფეხბურთის ლიგის პრეზიდენტმა დიმიტრი რამიშვილმა გადასცეს. მერე იყო თასით ხელში, ტრადიციული წრე, სურათები გამარჯვებულის ბანერთან, ფეირვერკები და გამარჯვებულთა მწვრთნელ თემურ მახარაძის ჰაერში შეთამაშება"...

	16/05/2008- ”ამერი” (თბილისი) - ”ზესტაფონი” 1-2
დაწვრილებით:

ზედა რიგში (მარცხნიდან მარჯნივ) - როინ ონიანი, პოლ კესანი, სევასტი თოდუა, უჩა ლობჟანიძე, გიორგი ხიდეშელი, როინ კვასხვაძე; ქვედა რიგში - ნიკა კვასხვაძე, ჟილვან გომეს ვიეირა, ედიკ საჯაია, ერნესტ აკუასაგა, ბექა გოცირიძე.