09.05.2024

ფრე გასვლაზე ლიდერთა ჯგუფის წარმომადგენელთან

2024 წლის 9 მაისს გაიმართა საქართველოს XXXVI ეროვნული ჩემპიონატის ლიგა 3-ს ტურნირის მეათე ტურის შეხვედრები - არჩილ ფარტენაძის სახელობის ქედის სტადიონზე ჩატარებულ დაპირისპირებაში ადგილობრივმა საფეხბურთო კლუბმა "ბეთლემმა" "ზესტაფონს" უმასპინძლა.

ზესტაფონელები დღევანდელ შეხვედრას მნიშვნელოვანი საკადრო პრობლემებით შეხვდნენ - სანდრო სათირიშვილისა და შოთა ფანცულაიას დისკვალიფიკაციით გამოწვეულ უქმობას გიორგი სამხარაძის და გიორგი კლდიაშვილის ავადმყოფობა დაემატა და ქედელებთან სათამაშოდ იმერლები მნიშვნელოვნად სახეშეცვლილი შემადგენლობით გავიდნენ...

შეხვედრის პირველი ნახევარი თანაბარ ბრძოლაში გაილია. თამაშის საწყის ნაწილში მასპინძლებმა რამდენიმე ნახევარმომენტი კი შექმნეს, თუმცა ეს ეპიზოდები სტუმართა კარისთვის ხიფათის შემცველი არ გახლდათ. პირველი ტაიმის მიწურულს ქედელთა საჯარიმოში დათო ბებიაშვილის წაქცევისათვის თითქოს პენალტი უნდა დანიშნულიყო, თუმცა მატჩის არბიტრმა ბორის გლუშჩუკმა წესის დარღვევა მხოლოდ მისთვის ცნობილი მიზეზის გამო არ დააფიქსირა. ბოლო წუთზე ანგარიშის გახსნა უკვე გიორგი წიქარიშვილს მართებდა, მაგრამ მისი დარტყმული არაზუსტი გამოდგა - 0:0.

უგოლო პირველი ტაიმისგან განსხვავებით, შეხვედრის მეორე ნახევარი უხვგოლიანი და სანახაობრივი გამოდგა. 50-ე წუთზე იმერელთა საჯარიმოში შექმნილი არეულობით ყველაზე უკეთ სულხან კახიძე გაერკვა და თავის გუნდი წინ გაიყვანა. სტუმართა პასუხმა არ დააყოვნა და 54-ზე წუთზე, შეტევის მარცხენა ფლანგიდან დათო ბებიაშვილის გარღვევისა და საჯარიმოში გაკეთებული გადაცემის შემდეგ, სლავა პაპავამ ანგარიშში წონასწორობა მახვილგონივრული დარტყმით აღადგინა.

70-ე წუთზე კი წინ ზემოიმერლები გავიდნენ - ამჯერად არეულობა უკვე მასპინძელთა საჯარიმოში შეიქმნა და დათო ბებიაშვილმა ზედიზედ მეორე მატჩში გატანილი გოლით წინ თავისი გუნდი გაიყვანა. ანგარიშის ისევ გასათანაბრებლად მასპინძლებს ათიოდე წუთი დასჭირდათ - 79-ე წუთზე სტუმართა საჯარიმოს მისადგომებიდან ნიკოლოზ გაბაძის ყუმბარისებური დარტყმა მთლიანობაში კარგად მოასპარეზე გიორგი აბრამიშვილსთვის აუღებელი გამოდგა. შედეგად, ფრე 2:2.

	09.05.2024. ”ბეთლემი” (ქედა) - ”ზესტაფონი” 2-2
"ზესტაფონი": აბრამიშვილი, მეტრეველი, ხუჯაძე, ბურჯანაძე, მჟავანაძე, დევდარიანი, ვოსკანოვი, პაპავა (ხელიძე, 81), ანდრიაძე, ბებიაშვილი (ჯობავა, 90), წიქარიშვილი. დაწვრილებით:

ჩემპიონატის მორიგ მატჩს "ზესტაფონი" 17 მაისს გამართავს - საქართველოს XXXVI ეროვნული ჩემპიონატის ლიგა 3-ის მეთერთმეტე ტურის შეხვედრაში მარგველები საფეხბურთო კლუბ "გარდაბანს" უმასპინძლებენ. მატჩი დავით აბაშიძის სახელობის სტადიონზე გაიმართება და 16:30 საათზე დაიწყება...