04.12.2023

2023 წლის სეზონი ციფრებში

საქართველოს XXXV ეროვნული საფეხბურთო ჩემპიონატის ლიგა 3-ის ტურნირი დასრულდა. ტრადიციისამებრ, სეზონის დასრულების შემდეგ ჩვენი ინტერნეტ-გვერდი გთავაზობთ სხვადასხვა სახის სტატისტიკურ ინფორმაციას, რომელიც საფეხბურთო კლუბ ”ზესტაფონისა” და გუნდის ფეხბურთელთა ინდივიდუალურ მიღწევებს უკავშირდება...

სულ, ახლახან დასრულებულ სეზონში საფეხბურთო კლუბ ”ზესტაფონმა” 31 მატჩი ჩაატარა - 30 შეხვედრა ეროვნული ჩემპიონატის ლიგა 3-ს ტურნირში და 1-ც დავით ყიფიანის სახელობის ეროვნული თასის გათამაშებაში...

თასის გათამაშებასა და ჩემპიონატში ჩატარებული 31 შეხვედრიდან 6 დასრულდა ზესტაფონელი ფეხბურთელების გამარჯვებით, 11 შეხვედრაში დაფიქსირდა ფრე, 14-ჯერ კი იმარჯვეს ჩვენმა მეტოქეებმა. გატანილი და გაშვებული ბურთების ბალანსი - 34-49.

რაც შეეხება 2023 წლის სეზონში საფეხბურთო კლუბ ”ზესტაფონის” მაისურით გამართული მატჩების რაოდენობით საუკეთესო შედეგს, ის გუნდის გოლკიპერ შოთა იგითხანიანს ეკუთვნის - მან მონაწილეობა 31-ვე მატჩში მიიღო. 29-ჯერ მოირგო "ზესტაფონის" მაისური შოთა ანდრიაძემ და 25-ჯერ გუნდის კაპიტანმა გიორგი სამხარაძემ...

უდავოდ საინტერესო ამბავთა რიცხვს განეკუთვნება ისიც, რომ ჩემპიონატში ჩატარებული 30-დან 30-ვე შეხვედრაში გუნდის შემადგენლობაში იასპარეზა შოთა იგითხანიანმა. შოთა ანდრიაძისა და გიორგი სამხარაძის ანგარიშზე შესაბამისად 28 და 25 შეხვედრაა. ზაალ ზუზაძემ და დავით ნუცუბიძემ 24-24 შეხვედრაში ითამაშეს, სანდრო სათირიშვილისა და შალვა ცქიფურიშვილის ანგარიშზე კი 23-23 მატჩია.

ჩემპიონატში ჩატარებული 30 შეხვედრიდან 6 დასრულდა ზესტაფონელი ფეხბურთელების გამარჯვებით, 11 შეხვედრაში დაფიქსირდა ფრე, 13-ჯერ კი იმარჯვეს ჩვენმა მეტოქეებმა. გატანილი და გაშვებული ბურთების ბალანსი - 33-46. აღსანიშნავია ისიც, რომ ეროვნული ლიგა 3-ის გუნდებს შორის ყველაზე მეტ შეხვედრაში (11-ჯერ) ფრედ სწორედ "ზესტაფონმა" ითამაშა.

სულ, განვლილი ჩემპიონატის 30 მატჩში საფეხბურთო კლუბ ”ზესტაფონის” მაისურით 29 ფეხბურთელმა იასპარეზა. ზესტაფონელთა მიერ გატანილი 33 გოლი ზემოიმერული გუნდის 10 ფეხბურთელის ანგარიშზეა, 1 ბურთიც საკუთარ კარში "ირაოს" მცველმა ლუკა ჯაფარიძემ გაიტანა...

ჩემპიონატის მსვლელობისას ყველაზე შედეგიანად "ზესტაფონის" თავდასხმის ხაზის ფეხბურთელები ირჯებოდნენ - მათ ანგარიშზე 19 გატანილი გოლია, ნახევარდაცვის ხაზის წარმომადგენლებმა თავი 10 გატანილი გოლით გამოიჩინეს, მცველებმა კი 4 გოლი გაიტანეს...

ზემოიმერული გუნდის საუკეთესო ბომბარდირი 9 გატანილი გოლით ნიკოლოზ ხელიძე გახდა, 6-6-ჯერ დაამწუხრეს იმერელთა მეტოქეები გამოცდილმა შალვა ცქიფურიშვილმა და ხანგრძლივი პაუზის შემდეგ იმერელთა რიგებში დაბრუნებულმა შოთა შეყილაძემ, 3 გოლი კი ზაალ ზუზაძის ანგარიშზეა...