05.11.2020

მიმდინარე სეზონში ზესტაფონელთა პირველი გამარჯვება

მიმდინარე წლის 5 ნოემბერს გაიმართა საქართველოს ეროვნული საფეხბურთო ჩემპიონატის ლიგა-4-ის ტურნირის "თეთრი" ჯგუფის პირველი წრის დასკვნითი, რიგით მეშვიდე ტურის შეხვედრები. დავით აბაშიძის სახელობის სტადიონზე საფეხბურთო კლუბმა ”ზესტაფონმა” სენაკის "ეგრისს" უმასპინძლა.

მატჩი ზესტაფონელთა შეტევებით დაიწყო და უკვე მე-7 წუთზე სტუმართა დაცვის ხაზის მიერ დაშვებული უხეში შეცდომის შემდეგ დასარტყმელ პოზიციაზე გასულმა ლაშა ოზბეთელაშვილმა სტუმართა კარი მშვიდად დალაშქრა. მე-12 წუთზე ანგარიში ორამდე გაიზარდა - ზესტაფონელთა სახიფათო იერიში ლაშა ნანობაშვილის სენაკელთა საჯარიმოში შეჭრითა და მისივე ზუსტი დარტყმით დასრულდა...

პირველი ტაიმის ბოლომდე იმერლებმა კიდევ ორი გოლით მოახერხეს სტუმართა გუნდის დამწუხრება - 29-ე და 41-ე წუთებზე ლაშა ოზბეთელაშვილმა კიდევ 2 გოლი შემატა საკუთარ საგოლე მონაგარს. პირველი ნახევრის ბოლო წუთზე კი "ეგრისი" მოედანზე 10 კაცით დარჩა - ნიკა ჯანიაშვილის წინააღმდეგ ძალიან უხეში თამაშის გამო მოედნიდან პაატა პერტაია იქნა გაძვებული.

მეორე ტაიმის დებიუტში გუნდებმა გატანილი გოლები გაცვალეს - ლაშა ნანობაშვილის მიერ 50-ე წუთზე გატანილ გოლს სტუმრებმა მე-60-ზე თენგო ფიფიას ლამაზი გასროლით უპასუხეს. სტუმართა მიერ ანგარიშის "დასველებას" მასპინძლებმა კიდევ ორი გოლით სწრაფადვე უპასუხეს - 61-ე წუთზე ლაშა ოზბეთელაშვილმა მორიგი გოლი გაიტანა და "პოკერის" ავტორობა გაიფორმა, ხოლო 64-ზე ეროვნულ ლიგა-4-ში გატანილი სადებიუტო გოლით თავი ნიკა ხარაიშვილმა გამოიჩინა.

უგოლოდ არც დღევანდელი შეხვედრის დასკვნით ნაწილს ჩაუვლია - 79-ე და 81-ე წუთებზე, ლაშა ნანობაშვილისა და კობა გოგობერიშვილს კარგი გადაცემების შემდეგ, გატანილი გოლებითა და შესრულებული "დუბლით" თავი ლაშა ოზბეთელაშვილის ნაცვლად მოედანზე შესულმა ბაჩო ბერაძემ გამოიჩინა. ზესტაფონელთა პირველი გამარჯვება მიმდინარე სეზონში დიდი ანგარიშით 9-1.

	05.11.2020. ”ზესტაფონი” - ”ეგრისი” (სენაკი) 9-1
"ზესტაფონი": მიქავა, ჯანიაშვილი (ხარაიშვილი, 45), ხუხუა, მოსიძე, გაჩეჩილაძე, ჩხიკვაძე, ზარნაძე (ვარდოსანიძე, 54), სამხარაძე, გოგობერიშვილი, ნანობაშვილი, ოზბეთელაშვილი (ბერაძე, 73). დაწვრილებით:

მორიგ შეხვედრას "ზესტაფონი" 11 ნოემბერს გამართავს - საქართველოს XXXII ეროვნული ჩემპიონატის ლიგა-4-ის "თეთრი" ჯგუფის მერვე ტურის შეხვედრაში იმერლები ქედის საფეხბურთო კლუბ "ბეთლემს" უმასპინძლებენ. აჭარლებთან მატჩი დავით აბაშიძის სახელობის სტადიონზე გაიმართება და 14:00 საათზე დაიწყება...