23.11.2017

თბილისის ზღვასთან მდებარე "ზესტაფონის" ბაზის ამბები

როგორც მოგეხსენებათ, თბილისის ზღვის მახლობლად მდებარე საფეხბურთო კლუბ "ზესტაფონის" ბაზაზე უკვე კარგა ხანია ამოქმედებულია თანამედროვე ტექნოლოგიების გამოყენებით შექმნილი უმაღლესი ხარისხის სტანდარტული ზომის ორი საფეხბურთო მოედანი...

ჩვენი კლუბის დედაქალაქურ ბაზაზე მწვანე საფარის დაგების პროცესსა და ამ საფარის გამართულად ფუნქციონირება-ექსპლუატაციისათვის საჭირო ინფრასტრუქტურის შექმნაში თავის წვლილი შემდეგმა კომპანიებმა შეიტანეს: "Hi Tech Irrigation Georgia"-მ, რომელიც ჩვენს ქვეყანაში საირიგაციო ტექნიკის მწარმოებელ სახელგანთქმულ ამერიკულ კომპანია "Hunter"-ს წარმოადგენს და კომპანია "Lawns of Georgia"-მ, რომელიც უმაღლესი ხარისხის ლანდშაფტურ და UEFA-ს სტანდარტების შესაბამის სპორტული დანიშნულების რულონურ გაზონებს საქართველოშივე ამზადებს...

"ზესტაფონის" ოფიციალური ვებგვერდის მომხმარებლისთვის კარგადაა ცნობილი ის ამბავი, რომ ჩვენს ქვეყანაში გამართული 19- და 17-წლამდელთა ნაკრებთა ევროპის ჩემპიონატის შესარჩევი ტურნირების მონაწილე გუნდები სწორედ თბილისის ზღვის მახლობლად მდებარე ზესტაფონელთა ბაზის მინდვრებზე ვარჯიშობდნენ. ჩვენი კლუბის სპორტული კომპლექსის მწვანე მინდვრებზე მიმდინარე წლის ივნისის თვეში საქართველოში გამართული რაგბის ახალგაზრდული მსოფლიო თასის მონაწილენიც ვარჯიშობდნენ...

როგორც მოგეხსენებათ, საქართველოს ეროვნულმა ნაკრებმა, რომელსაც სლოვაკი სპეციალისტი ვლადიმირ ვაისი ხელმძღვანელობს, ზედიზედ რამდენიმე საშინაო შეკრება იმერელთა საფეხბურთო კომპლექსის მოედნებზე გაიარა...

დღესდღეობით ბაზაზე უკვე ამოქმედებულია ადმინისტრაციული შენობა, რომელშიც გუნდებისა და მსაჯების აბანო-გასახდელების გარდა, დელეგატთა, სამედიცინო პერსონალის, საპროცედურო ოთახები, სატრენაჟორო დარბაზი და მედია-კაფე გახლავთ განთავსებული. ამასთან, მოეწყო მცირე ზომის ტრიბუნა, რომელზეც 300-მდე მაყურებლის განთავსებაა შესაძლებელი.

გთავაზობთ ფოტორეპორტაჟს, რომელიც ჩვენი კლუბის თბილისურ ბაზაზე სადღეისოდ არსებული ვითარების შესახებ მოგვითხრობს...

ფოტომასალა მოწოდებულია თაკო კოკაიას მიერ