27.12.2014
ზესტაფონელთა ყველა ოფიციალური მატჩი
7 დეკემბერს დასრულდა საქართველოს XXVI ეროვნული საფეხბურთო ჩემპიონატის საშემოდგომო ნაწილი. სულ რამდენიმე დღის წინ საფეხბურთო კლუბ "ზესტაფონის" ოფიციალურმა ვებგვერდმა ეროვნული ჩემპიონატის უმაღლეს ლიგაში ჩვენი გუნდის მიერ ჩატარებული მატჩების სტატისტიკა შემოგთავაზათ. დღეს კი მარგველთა მიერ გამართული ყველა ოფიციალური მატჩის შესახებ მოგითხრობთ.
როგორც უკვე მოგეხსენებათ, საფეხბურთო კლუბ ”ზესტაფონს” ეროვნულ ჩემპიონატებში გამართული აქვს 335 მატჩი, აქედან 186 დასრულდა ზესტაფონელი ფეხბურთელების გამარჯვებით, 71 შეხვედრაში დაფიქსირდა ფრე, 78-ში კი იმარჯვეს ზესტაფონელთა მეტოქეებმა. ბურთების სხვაობაა 551-292. ამ მატჩებში საფეხბურთო კლუბ ”ზესტაფონს” მოპოვებული აქვს 629 ქულა.
შეგახსენებთ, რომ თბილისურ "დინამოსთან" და "ვიტ-ჯორჯიასთან" ერთად, საფეხბურთო კლუბი ”ზესტაფონი” წარმოადგენს ქართული კლუბების სამეულს, რომელსაც დამოუკიდებელი ქართული ფეხბურთის არსებობის ხანაში სამივე ქართული ტიტულის (ჩემპიონის ოქრო, ეროვნული თასი და სუპერთასი) მოპოვება მოუხერხებია. ზემოთნახსენები "ტრიოს" გარდა, ასეთი შედეგისათვის არც ერთ ქართულ კლუბს არ მიუღწევია.
აქვე მოგახსენებთ იმასაც, რომ შექმნის დღიდან ”ზესტაფონს” გამართული აქვს 69 მატჩი დავით ყიფიანის სახელობის საქართველოს ეროვნული თასის გათამაშებაში, რომელთაგან 40 დასრულდა მარგველთა გამარჯვებით, 15 დასრულდა ფრედ, 14-ჯერ კი ზესტაფონელები დამარცხდნენ, ბურთების სხვაობაა 123-51 მარგველთა სასარგებლოდ.
საქართველოს სუპერთასის გათამაშებაში იმერლებს 3-ჯერ უთამაშია - ამ მატჩებში მათ თითო გამარჯვება, ფრე, მარცხი და გატანილ-მიღებული ბურთების დადებითი ბალანსი 3-2 დაუგროვდათ.
ორიოდე სიტყვით შევეხებით ევროსარბიელსაც - ევროპულ საკლუბო ტურნირებში მარგველებს გამართული აქვთ 24 მატჩი, რომელთაგან 6 დასრულდა მათი გამარჯვებით, 7 დასრულდა ფრედ, 11-ჯერ კი იმარჯვეს ზესტაფონელთა ოპონენტებმა. ბურთების სხვაობაა 35-31 ჩვენი გუნდის სასარგებლოდ.
აქვე უნდა ითქვას ისიც, რომ ევროპის ლიგის გათამაშების ისტორიაში პირველი ჰეთ-თრიკი სწორედ "ზესტაფონის" ფეხბურთელმა ჯაბა დვალმა შეასრულა. მარგველთა ფორვარდმა ჩრდილოირლანდიურ "ლისბერნთან" 2009 წლის 9 ივლისს ზესტაფონში გამართულ შეხვედრაში ბრიტანელთა კარი სამჯერ დალაშქრა. ევროპული ფეხბურთის ისტორიაში დვალის შესვლა უეფას ოფიციალურმა ვებგვერდმაც გვამცნო. აი, რა დაიწერა იქ "ზესტაფონი"-"ლისბერნის" მატჩზე: "ევროპის ლიგის ეს თამაში გათამაშების ისტორიაში გამორჩეულად ჩაიწერა, რადგან სწორედ ამ შეხვედრაში შესრულდა ამ ტურნირის პირველი ჰეთ-თრიკი. 3 000 გულშემატკივრის თვალწინ "ზესტაფონმა" "ლისბერნი" 6:0 გააცამტვერა. გატანილი გოლების ნახევარი - მასპინძელთა ფორვარდ ჯაბა დვალის ანგარიშზეა".
თქვენს სამსჯავროზე გამოტანილი დღევანდელი პუბლიკაციის შეჯამებისას კი მოგახსენებთ, რომ სულ, 2014 წლის 28 დეკემბრის მდგომარეობით, საფეხბურთო კლუბ ”ზესტაფონს” გამართული აქვს 431 ოფიციალური მატჩი, მოპოვებული აქვს 233 გამარჯვება და 94 ფრე, განცდილი აქვს 104 მარცხი, მეტოქეთა კარში გატანილი 712 აქვს და მიღებული აქვს 376 ბურთი.
|
