2014 წლის 24 აგვისტოს საქართველოს XXVI ეროვნული ჩემპიონატის უმაღლესი ლიგის გუნდების დუბლიორთა ტურნირის მესამე ტურის მატჩები გაიმართა. საფეხბურთო კლუბ ”ზესტაფონის” რეზერვისტებმა თბილისის ”დინამოს” მეორე გუნდს საკუთარ ბაზაზე უმასპინძლეს.
საფეხბურთო კლუბ "ზესტაფონისა" და თბილისის "დინამოს" პირველი გუნდების გუშინდელი დაპირისპირების მსგავსად, ამავე კლუბების მეორე გუნდების მატჩიც საინტერესო, დაძაბული და უხვგოლიანი გამოდგა. უნდა ითქვას, რომ დღევანდელ შეხვედრაშიც ანგარიშით 3-2 გამარჯვება სტუმრებმა იზეიმეს...
შეხვედრის პირველი ნახევარი უფრო აქტიურად მასპინძლებმა კი დაიწყეს, მაგრამ თანდათანობით თამაში გათანაბრდა, შემდეგ კი უკვე სტუმართა უპირატესობაც გამოიკვეთა. ანგარიში 20-ე წუთზე გაიხსნა - დინამოელმა არჩილ მესხმა კარგად შეასრულა ჯარიმა და აუღებელი დარტყმით მასპინძელთა გოლკიპერს საკუთარი კარის გადარჩენის შანსი არ დაუტოვა.
ტაიმის მიწურულს ანგარიში ორამდე გაიზარდა - 39-ე წუთზე დინამოელებმა ზესტაფონელთა კართან კუთხურის ჩამოწოდების უფლება მოიპოვეს და ბუდუ ზივზივაძემ ზუსტი თავურით მეორედ დალაშქრა დავით კუპატაძის კარი...
მეორე ტაიმის დებიუტში ზემოიმერლებმა დინამოელთა კართან ერთგვარი შტურმი მოაწყვეს და ბექა მიქელთაძის დუბლის წყალობით (48-ე და 53-ე წუთები) ანგარიში გაათანაბრეს კიდეც...
ამის შემდეგ ზესტაფონელთა საფეხბურთო ბაზის პირველი მოედნის მწვანე გაზონზე გახსნილი ფეხბურთი გაჩაღდა. ორივე გუნდი გამარჯვების მოპოვებას ლამობდა და ამისათვის ძალ-ღონეს არც სტუმარი და არც მასპინძელი არ იშურებდა. ასეთ თამაშში, საბოლოოდ, დინამოელებს გაუმართლათ - 85-ე წუთზე ზესტაფონელთა მცველმა დავით მოსიძემ თბილისელთა შეტევის ჩაშლას შეეცადა, თუმცა ბურთი საკუთარი კარის ბადეში ჩაჭრა ...
