2014 წლის 13 აგვისტოს საფეხბურთო კლუბმა ”ზესტაფონმა”, რომელიც ეროვნული ჩემპიონატის მეორე ტურის მატჩისთვის ემზადება, ამხანაგური მატჩი გამართა. დავით აბაშიძის სახელობის სტადიონზე გამართულ სპარინგ-შეხვედრაში ქვეყნის ვიცე-ჩემპიონი პირველი ლიგის წარმომადგენელს, წყალტუბის ”სამგურალს” დაუპირისპირდა.
მარგველთა დამრიგებელმა გია გეგუჩაძემ თავის გუნდი ორი შემადგენლობით ათამაშა. შესვენებისას "ზესტაფონის" რიგებში ერთბაშად 10 ცვლილება განხორციელდა. აქვე უნდა ითქვას ისიც, რომ საქმეს გარკვეული დანაკლისის გარეშე არ ჩაუვლია - მცირე ტრავმების გამო თავის გუნდს გიორგი ფანცულაია და კახა მეშველიანი ვერ ეხმარებოდნენ.
როგორც მოგახსენეთ, შეხვედრა დავით აბაშიძის სახელობის სტადიონზე გაიმართა და მატჩს 150-მდე ადგილობრივი ქომაგი და ფეხბურთის სპეციალისტი დაესწრო. ქვეყნის ორგზის ჩემპიონებმა ასეთი შემადგენლობით იასპარეზეს:
შეხვედრა უმაღლესლიგელთა უდიდესი უპირატესობით წარიმართა და საბოლოოდ დიდი ანგარიშით 7-1 დასრულდა. უშუალოდ შეხვედრის მიმდინარეობაზე დეტალური საუბრით თავს აღარ შეგაწყენთ. გეტყვით მხოლოდ იმას, რომ ქვეყნის ვიცე-ჩემპიონთა რიგებში გატანილი გოლებით თავი დემურ კანდელაკმა, ბექა მიქელთაძემ, გურამ სამუშიამ, გიორგი ჭანკოტაძემ, ლევან შარიქაძემ, რენე ფერეირამ და თორნიკე კაპანაძემ გამოიჩინეს, წყალტუბოელთაგან კი მატჩის ბოლო წუთებზე თავი ბექა ბიბილაშვილმა გამოიჩინა.
