24.06.2014

ინტერვიუ გია გეგუჩაძესთან

გია გეგუჩაძე

სლოვაკური "სპარტაკი" (ტრნავა) ან მალტური "ჰიბერნიანსი" - ამ ორი გუნდიდან ერთი "ზესტაფონის" მეტოქე იქნება ევროპალიგის მეორე საკვალიფიკაციო ეტაპზე.

რა თქმა უნდა, ფავორიტი სლოვაკური გუნდია. სხვათა შორის, "სპარტაკის" სტადიონი ახლა რემონტშია და სხვა ქალაქში (ზლატე მორავცე) მოუწევს მალტელთა მიღება, დიდი ალბათობით - "ზესტაფონისაც".

ნიონური წილისყრის შეფასება ზესტაფონელთა თავკაც გია გეგუჩაძეს ვთხოვეთ:

- ერთს ვიტყვი თავიდანვე: ყველა მეტოქე უნდა დავაფასოთ, - თქვა გეგუჩაძემ საუბრის დასაწყისში. - ჯერ არ ვიცით, ვისთან მოგვიწევს თამაში. ფავორიტი იმ წყვილში სლოვაკური გუნდია, მაგრამ ფეხბურთი ისეთია დღეს, რომ არაფერი უნდა გაგვიკვირდეს.

აგერ, მსოფლიო ჩემპიონატი გვაქვს ცოცხალ მაგალითად.

- და მაინც, ფავორიტი "სპარტაკია"...
- ამაში გეთანხმებით, თუმცა უნდა დაველოდოთ. ვინც უნდა იყოს, წინ დიდი ბრძოლა გველის. ამას აქედანვე უნდა შევეგუოთ.

- პირველი მატჩი სტუმრად გიწევთ. ეს უპირატესობას აძლევს "ზესტაფონს" თუ არ აქვს გადამწყვეტი მნიშვნელობა?
- გადამწყვეტი არა, მაგრამ მცირედი უპირატესობა კი გვექნება. თუმცა ამის იმედზე ვერ ვიქნებით. მთავარია, ჩვენი თამაში ვითამაშოთ.

- პოტენციურ მეტოქეთა მატჩებს ხომ არ ნახავთ თქვენ ან გუნდის რომელიმე წარმომადგენელი?
- როგორც იცით, სამშაბათს "ზესტაფონი" ავსტრიულ შეკრებაზე მიემგზავრება. გზა, მოწყობა სასტუმროში - ჯერ ამაზე ვფიქრობთ. ვნახოთ, გამორიცხული არაფერია. არც ერთი ნიუანსი არ უნდა გამოგვეპაროს.

- რა იქნება "ზესტაფონის" მიზანი ევროთასებზე? ფაქტია, ახალი გუნდი გყავთ, მაგრამ - მნიშვნელოვნად გაძლიერებული. ეს შედეგის მოლოდინს ამძაფრებს...
- მართლაც სოლიდური შევსება მივიღეთ. ახლა საქმე ჩვენზე, ანუ სამწვრთნელო შტაბზეა დამოკიდებული. ეს ფეხბურთელები უნდა მივიყვანოთ ოპტიმალურ სათამაშო კონდიციებამდე, რათა ევროთასებზე გუნდმა ბოლომდე გამოავლინოს საკუთარი შესაძლებლობები...

და რაც შეეხება მიზნებს - ვითამაშოთ შედეგიანი და ლამაზი ფეხბურთი, რაც გაახარებს გულშემატკივარს - ეს არის მიზანი, რის მიღწევასაც შევეცდებით.

გპირდებით, რომ ყველა ფეხბურთელი უზომოდ იქნება მოტივირებული, რათა საქართველო ღირსეულად წარმოაჩინოს საერთაშორისო ასპარეზზე.

- ავსტრიული შეკრების კონტურებით, ალბათ, კმაყოფილი ბრძანდებით...
- ავსტრიაში ძლიერ გუნდებთან ვითამაშებთ და ეს ძალიან მნიშვნელოვანია. კიევის "დინამოსა" და "შახტართან" უკეთ დავინახავთ საკუთარ ძალასა და სისუსტეს.

- ავსტრიაში ოთარ ხიზანეიშვილსაც იახლებთ?
- მასთან სიტყვიერი შეთანხმება უკვე მიღწეულია. სავიზო პრობლემების მოგვარების შემდეგ, ოთარი ოდნავ მოგვიანებით ჩამოვა ავსტრიაში.

- შეკრებაზე ახალ მოთამაშეებს ხომ არ გასინჯავთ?
- ასეთი რამ არ იგეგმება, თუმცა ვერაფერს გამოვრიცხავთ.

- ევროპა ლიგის პირველი მატჩისთვის დაგეგმილი დასკვნითი მოსამზადებელი პერიოდი ზესტაფონში ჩაივლის?
- კი, ავსტრიიდან დაბრუნების შემდეგ გუნდი მშობლიურ ქალაქში მოემზადება.