27.03.2014

ჩემპიონატის ლიდერთა მატჩის მოლოდინში

10.04.2011. გიორგი ჭანკოტაძის გოლი "დინამოს" კარში

შაბათს, 29 მარტს, საფეხბურთო კლუბი ”ზესტაფონი” ეროვნული პირველობის მორიგ მატჩს გამართავს. თბილისის სტადიონი "დინამო-არენა" ზესტაფონელთა და თბილისელ დინამოელთა რიგით ოცდამეთორმეტე საჩემპიონატო დაპირისპირებას უმასპინძლებს - ოცდამეოთხე ტურის შეხვედრაში მარგველები მიმდინარე პირველობის ერთპიროვნულ ლიდერს ესტუმრებიან.

დამოუკიდებელი ქართული ფეხბურთის ხანაში ყველაზე მეტი ტიტულის შემგროვებელ დინამოელებთან ქალაქ ზესტაფონის წარმომადგენელი კლუბების დაპირისპირებათა ისტორია ათვლას რიგით მეორე ეროვნული ჩემპიონატიდან მოყოლებული იწყებს... 1991-2003 წლებში გამართულ მატჩებში ”მარგვეთმა” და ”მეტალურგმა” ვერ ახერხებდნენ თბილისელთათვის დიდი წინააღმდეგობის გაწევას, თუმცა, აღსანიშნავია ისიც, რომ დინამოელთა ულაპარაკო დომინირების პირობებშიც კი ("დინამომ" გასული საუკუნის 90-იან წლებში ჩატარებული ყველა ეროვნული ჩემპიონატი მოიგო) ზესტაფონის "მარგვეთმა" თბილისელები ორ შეხვედრაში მაინც დაამარცხა...

რაც შეეხება დინამოელებთან საფეხბურთო კლუბ "ზესტაფონის" "ურთიერთობებს" - სადღეისოდ ეროვნულ ჩემპიონატში გუნდებმა ერთმანეთში 31 შეხვედრა გამართეს. ამ მატჩებში 17-ჯერ გაიმარჯვეს თბილისელებმა, 6 დასრულდა ფრედ, 8 კი მოიგეს ზესტაფონელებმა. გატანილი და გაშვებული ბურთების სხვაობაში უპირატესობას სწორედ თბილისელი ფეხბურთელები ფლობენ - 45:28.

საკმაოდ ხშირი გახლდათ თბილისურ-ზესტაფონური "ჯახები" დავით ყიფიანის სახელობის ეროვნული თასის გათამაშებაშიც. უნდა ითქვას, რომ აქ უპირატესობა იმერლების მხარესაა: სადღეისოდ გამართულ 8 სათასო შეხვედრაში 3-ჯერ იმერლებმა იმარჯვეს, 2-ჯერ დედაქალაქელებმა, 3 მატჩიც ფრედ დასრულდა, ბურთების სხვაობა 5:4 ”ზესტაფონის” სასარგებლოდ. ერთხელაც გუნდები სუპერთასისათვის მატჩში შეხვდნენ ერთმანეთს და ის შეხვედრა თბილისელთა მინიმალური გამარჯვებით (1-0) დასრულდა.

სულ, 2004 წლის შემდეგ, "დინამოსა" და "ზესტაფონს" შორის 40 შეხვედრაა ჩატარებული, აქედან 20-ში დედაქალაქელებმა იმარჯვეს, 11-ში იმერლებმა, 9 მატჩი კი დასრულდა ფრედ, ბურთების სხვაობა 50:33 ”დინამოს” სასარგებლოდ.

საკმაოდ საინტერესოა ის, რომ ზესტაფონელთაგან დინამოელთა კარში სხვაზე ხშირად ჯაბა დვალს გაუტანია - ჯაბას "დინამოს" კარში 4 გოლი აქვს გატანილი. 2-2-ჯერ თბილისელთა კარის ბადე ერთბაშად 6 ზესტაფონელ ფეხბურთელს (შოთა ბაბუნაშვილი, თორნიკე გორგიაშვილი, ზურაბ იონანიძე, ბექა გოცირიძე, ზაალ ელიავა და ნიკოლოზ გელაშვილი) შეურხევია. დღესდღეობით მარგველთა რიგებში მოასპარეზე ფეხბურთეთაგან კი "დინამოს" კარში ფეროელთა მაისურით ასპარეზობისას გატანილი გოლებით გიორგი ჭანკოტაძე, თეიმურაზ ღონღაძე და ვახტანგ ჭანტურიშვილი იწონებენ თავს ...

თბილისის "დინამოსთან" შაბათს გასამართი შეხვედრა 18:00 საათზე დაიწყება.

”ზესტაფონისა” და თბილისის ”დინამოს” ყველა მატჩი ეროვნულ ჩემპიონატში: