27.02.2014

დუბლიორთა ტურნირის მეცხრამეტე ტური

მიმდინარე წლის 27 ტებერვალს განახლდა საქართველოს XXV ეროვნული ჩემპიონატის უმაღლესი ლიგის გუნდების დუბლიორთა ჩემპიონატი. ტურნირის მეცხრამეტე ტურის შეხვედრაში საფეხბურთო კლუბ ”ზესტაფონის” რეზერვისტებმა საკუთარ ბაზაზე ”ზუგდიდის” მეორე გუნდს უმასპინძლეს.

ზესტაფონელებმა ასეთი შემადგენლობით იასპარეზეს: მეშველიანი, თორ. გრიგალაშვილი, თედ. გრიგალაშვილი, გაგოშიძე (მოსიძე, 80), ენდელაძე, აჯურუ (მაკარიძე, 56), ჭანკოტაძე (არველაძე, 58), სარდალიშვილი (ეგუტიძე, 63), კაკუშაძე, მიქელთაძე, კანდელაკი (ყანჩაველი, 11).

შეხვედრა მასპინძელთა შეტევებით, სტუმართა კარში დანიშნული პენალტითა და ზუგდიდელთა გოლკიპერ ვახტანგ ჯომიდავასთვის ნაჩვენები წითელი ბარათით დაიწყო. ბექა მიქელთაძის წაქცევისათვის დანიშნული 11-მეტრიანი 5-ე წუთზე გოლად თავად დაზარალებულმა აქცია. ამას ზესტაფონელთა რამდენიმე ძალიან სახიფათო, მაგრამ გამოუყენებელი იერიში მოყვა. 10-ე წუთზე კი მეტოქეთა რიგებში მყოფი ფეხბურთელების რაოდენობა გათანაბრდა - საჯარიმოს ფარგლებს გარეთ ხელით თამაშის გამო მოედნიდან უკვე ზესტაფონელთა კარის დარაჯი კახა მეშველიანი გააძევეს...

ზუგდიდელებმა ანგარიშის გათანაბრება მალევე მოახერხეს - 18-ე წუთზე მასპინძელთა ახალგაზრდა გოლკიპერ პაატა ყანჩაველს აუღებელი გიორგი ბულიამ დაურტყა. ისევ დასაწინაურებლად მასპინძლებს სულ რაღაც 4 წუთი დასჭირდათ - გოლი ავთო ენდელაძის ანგარიშზეა. ტაიმის ბოლო წუთებში იმერლებმა კიდევ ორჯერ დაამწუხრეს სტუმრები - 42-ე წუთზე მიხეილ სარდალიშვილის და 44-ე წუთზე ბექა მიქელთაძის ზუსტი დარტყმების შემდეგ ანგარიში დიდამდე გაიზარდა.

თამაშის სცენარი არც მეორე ნახევარში შეცვლილა, იმერლები ბევრს უტევდნენ და შედეგად, მეტოქის კარის აღება კიდევ სამჯერ მოახერხეს - 55-ე წუთზე გატანილი გოლით თავი ბექა კაკუშაძემ გამოიჩინა, ხოლო 60-ე და 81-ე წუთებზე ბექა მიქელთაძემ თავის მონაგარს კიდევ ორი ბურთი შემატა და "პოკერის" ავტორობაც მოინადირა. იმერელთა გამარჯვება დიდი ანგარიშით 7-1.