25.02.2014

ჩვენი მეტოქე - "ზუგდიდი"

ოთხშაბათს, 26 თებერვალს, საფეხბურთო კლუბი ”ზესტაფონი” საქართველოს XXV ეროვნული ჩემპიონატის საგაზაფხულო სტადიის რიგით მეორე მატჩს გამართავს. დავით აბაშიძის სახელობის სტადიონზე გასამართ ეროვნული პირველობის მეცხრამეტე ტურის შეხვედრაში იმერლები საფეხბურთო კლუბ "ზუგდიდს" დაუპირისპირდებიან.

ზუგდიდისა და ზესტაფონის კლუბების დაპირისპირებათა ისტორია რიგით მეორე ეროვნული ჩემპიონატიდან მოყოლებული იწყებს ათვლას. ჩვენ კი თქვენს ყურადღებას ზუგდიდელებთან უშუალოდ საფეხბურთო კლუბ "ზესტაფონის" "ურთიერთობებზე" შევაჩერებთ - იმერელთა და მეგრელთა "გაცნობა" 2005 წლის 23 აგვისტოს მოხდა - ეროვნული თასის გათამაშების პირველ მეთექვსმეტედფინალურ შეხვედრაში, რომელსაც ზესტაფონის ცენტრალურმა სტადიონმა უმასპინძლა, მასპინძლებმა ანგარიშით 3-0 მოუგეს საფეხბურთო კლუბ "ზუგდიდს". საპასუხო შეხვედრა იმავე წლის 13 სექტემბერს სენაკში გაიმართა და იმერლებმა კიდევ უფრო დიდი სხვაობით დაამარცხეს მეტოქე - 4-0. აქვე მოგახსენებთ იმასაც, რომ ზესტაფონელებს "ზუგდიდური ბარიერის" გადალახვა მათთვის ყველაზე დიდი წარმატების მომტან 2007-2008 წლის სათასო გათამაშებაშიც მოუხდათ - 2007 წლის 2 ოქტომბერს გამართულ ჯგუფური ეტაპის მეორე ტურის შეხვედრაში ზესტაფონელებმა მეტოქე 6-3 დაამარცხეს, ხოლო 5 ნოემბერს ზუგდიდს მეორე გუნდით ესტუმრნენ და მატჩი 0-2 დათმეს.

ეროვნულ ჩემპიონატში გამართული პირველი დაპირისპირება 2007 წლის 25 აგვისტოს ზესტაფონში გაიმართა - მატჩის მიწურულს ზურაბ იონანიძის მიერ შესრულებული "დუბლით" მასპინძლებმა 2-0 იმარჯვეს, ხოლო გულია თუთბერიძის სახელობის სტადინზე გამართული XIX ჩემპიონატის საპასუხო შეხვედრა ფრედ 0-0 დასრულდა.

XX და XXI ეროვნულ ჩემპიონატებში გამართულ შეხვედრებში მხოლოდ ზესტაფონელები იმარჯვებდნენ - 2008-2009 წლის საფეხბურთო სეზონში იმერლებმა ზუგდიდის "მგლები" ორჯერ შინ (1-0 და 3-1) და ერთხელაც სტუმრად (1-0) დაამარცხეს, ხოლო მომდევნო წელს უკვე "ბაიასთან" მატჩებში ზედიზედ 4 გამარჯვებას მოუყარეს თავი - ორჯერ შინ (2-1 და 4-0) და ამდენჯერვე სტუმრად (1-0 და 1-0).

XXII ეროვნულ ჩემპიონატში გამართული პირველივე ზუგდიდურ-ზესტაფონური დუელი აღსანიშნავია იმით, რომ სწორედ 2010 წლის 11 სექტემბერს შემდგარ შეხვედრაში, გიორგი მეგრელაძის დუბლის მეშვეობით, სამეგრელოს წარმომადგენელმა (კერძოდ, "ბაიამ") პირველად და დღემდე უკანასკნელად მოახერხა საფეხბურთო კლუბ "ზესტაფონის" ძლევა, ის მატჩი 2-1 დასრულდა. ამის შემდეგ, პირველი საჩემპიონო ტიტულის მოსაპოვებლად მომართულმა იმერლებმა ზედიზედ 3 მარცხი აგემეს ოპონენტს - ორჯერ შინ (6-1 და 3-0) და ერთხელ სტუმრად (3-1).

უდავო იყო "ზესტაფონის" უპირატესობა მეორე საჩემპიონო ტიტულის მოპოვებისას - მარგველებმა მოიგეს ზესტაფონში შემდგარი ორივე შეხვედრა (1-0 და 4-1), ხოლო ზუგდიდში გამართული ორი მატჩიდან ერთი მოიგეს ანგარიშით 2-1, ხოლო მეორე დასრულდა ფრედ ანგარიშით 1-1.

წინა ჩემპიონატშიც მეტოქეებმა ოთხი მატჩი გამართეს - 2012 წლის 20 ოქტომბერს "დავით აბაშიძეზე" გამართულ შეხვედრაში ზესტაფონელებმა მინიმალური ანგარიშით იმარჯვეს (1-0), ხოლო 19 დეკემბერს განმუხურში ზუგდიდელებს უფრო დამაჯერებლად (3-0) სძლიეს, 2013 წლის 6 აპრილს განმუხურში დაფიქსირდა ფრე (0-0), ხოლო ზესტაფონში 12 მაისს გამართულ შეხვედრაში გამარჯვება (2-0) იმერლებმა იზეიმეს.

მიმდინარე სეზონის პირველი წრის მატჩი გასული წლის 6 ოქტომბერს განმუხურში გაიმართა და ზესტაფონელთა გამარჯვებით (3-0) დასრულდა. გამარჯვებულთა რიგებში გატანილი გოლებით თავი ლევან შარიქაძემ და საბა ლომიამ (ორჯერ) გამოიჩინეს.

სულ, ეროვნული პირველობის ეგიდით საფეხბურთო კლუბმა "ზესტაფონმა" და ზუგდიდელებმა ერთმანეთში 22 შეხვედრა გამართეს. ამ მატჩებში 18-ჯერ გაიმარჯვეს იმერლებმა, 3 დასრულდა ფრედ, 1 კი მოიგეს სამეგრელოს წარმომადგენლებმა. არაა გასაკვირი არც გატანილი და გაშვებული ბურთების ბალანსში მარგველთა დიდი უპირატესობა - 45-9.

საინტერესოა, რომ გვიან შემოდგომაზე ზუგდიდურ კლუბში სამწვრთნელო ცვლილება განხორციელდა - გუნდი ეროვნულ ჩემპიონატში მცირე პაუზის შემდეგ დაბრუნებულმა გიორგი დარასელიამ ჩაიბარა და ზამთრის შესვენებამდე გუნდს მნიშვმელოვანი ქულებიც მოაპოვებინა. ახლახან დასრულებული პაუზისას "ზუგდიდმა" მაქსიმე ქვილითაია, თორნიკე ზარქუა, დავით კირკიტაძე, გურამ სამუშია და უცხოელი ფეხბურთელები დაიმატა. ამასთან, თურქეთის ხმელთაშუაზღვისპირეთში მოსამზადებელი შეკრებაც გაიარა ...

საფეხბურთო კლუბ "ზუგდიდთან" კვირას გასამართი შეხვედრა, რომელსაც ეროვნული კატეგორიის არბიტრი ალექსანდრე კრიჭაშვილი მოემსახურება, 18:00 საათზე დაიწყება...