10.02.2014

უხვგოლიანი მატჩი სერბებთან

2014 წლის 10 თებერვალს ხმელთაშუაზღვისპირეთში მყოფმა საფეხბურთო კლუბმა ”ზესტაფონმა” მორიგი ამხანაგური შეხვედრა ჩაატარა. თურქული შეკრების რიგით მესამე მატჩში ზემოიმერელთა მეტოქე სერბეთის უმაღლესი ლიგის წარმომადგენელი საფეხბურთო კლუბი ”დონიი სრემი” გახლდათ.

სერბულ-ქართული დაპირისპირება ადგილობრივი დროით 19:00 (თბილისის დროით - 21:00) საათზე დაიწყო. ვოივოდინას მხარის ქალაქ პეჩინცის წარმომადგენელი კლუბი, რომელსაც ადგილობრივი სპეციალისტი ვლადო ჩაპლიჩი წვრთნის, თავის ქვეყნის მიმდინარე ჩემპიონატში აუტსაიდერთა შორის იმყოფება და უმაღლეს დივიზიონში ადგილის შესანარჩუნებლად იბრძვის. საინტერესოა, რომ დაარსებიდან პირველ წლებში "დონიი სრემი" "ბორაცის" სახელწოდებით ასპარეზობდა.

ზესტაფონელთა დამრიგებელმა გია გეგუჩაძემ ბოიან პავლოვიჩს, ზაზა ჭელიძეს, რევაზ გეწაძესა და გრიგოლ დოლიძეს დღეს დასვენების საშუალება მისცა. უნდა ითქვას, რომ ჩვენმა გუნდმა ექსპერიმენტალური შემადგენლობით იასპარეზა - რამდენიმე ახალგაზრდა ფეხბურთელს ძირითად შემადგენლობაში მოედანზე გასვლისა და თავის გამოჩენის შესაძლებლობა მიეცა.

უნდა ითქვას, რომ შეხვედრის საწყის მონაკვეთში ქართველ ფეხბურთელებს მცირე ნერვიულობა ეტყობოდათ, რამაც ასახვა ანგარიშშიც ჰპოვა - სერბთა შეტევის მარჯვენა ფრთიდან 13-ე წუთზე განვითარებული შეტევა საჯარიმოში გაკეთებული კარგი გადაცემითა და უროშ კოშუტიჩის ზუსტი დარტყმით დაგვირგვინდა.

ანგარიშში ჩამორჩენის შემდეგ იმერლები თანდათანობით დაწყნარდნენ და თამაში მეტოქის ნახევარზე მალევე გადაიტანეს. ამან შედეგი 27-ე წუთზე მოიტანა - საჯარიმოს მისადგომებიდან ზუსტად თორნიკე კაპანაძემ გაისროლა. პირველი ტაიმის ბოლო წუთზე კი წინ უკვე ზესტაფონელები გავიდნენ - საჯარიმოს ხაზის სიახლოვეს დანიშნული სტანდარტი საგოლე დარტყმით ნიკა საბანაძემ დააგვირგვინა.

მეორე ტაიმი მთლიანად ქართველთა კარნახით წარიმართა. "დონიი სრემმა" მეტოქის ნახევარზე თამაშის გადატანა მხოლოდ ნახევარი საათის გასვლის შემდეგ მოახერხა, როდესაც იმერელთა კართან ზედიზედ სამი კუთხური იქნა ჩაწოდებული. "ზესტაფონმა" თავი კარგად დაიცვა და პირველსავე საპასუხო აქციაში მეტოქე მესამედ დაამწუხრა - გოლი 77-ე წუთზე ვახტანგ ჭანტურიშვილის ანგარიშზეა.

მართალია, ამის შემდეგ თამაში ოდნავ დამშვიდდა, თუმცა მარგველთა უპირატესობა ეჭვს სულაც არ იწვევდა. საბოლოოდ, 88-ე წუთზე სერბთა კარში კიდევ ერთი გოლი იქნა გატანილი - შეტევის მარჯვენა ფლანგიდან თეიმურაზ ღონღაძის ზუსტი პასის შემდეგ დიმიტრი ტატანაშვილმა იმერელთა რიგებში თავის პირველი გოლი გაიტანა. "ზესტაფონის" გამარჯვება დიდი ანგარიშით 4-1.

"ზესტაფონი": კუპატაძე, თორნიკე გრიგალაშვილი (ღონღაძე, 64), თედორე გრიგალაშვილი (გურული, 64), გაგოშიძე (ფერეირა, 64), ენდელაძე, აჯურუ (შარიქაძე, 64), სარდალიშვილი (ჭანტურიშვილი, 64), მაკარიძე (კაკუშაძე, 53), ჭანკოტაძე (კუხიანიძე, 64), საბანაძე (ფანცულაია, 64), კაპანაძე (ტატანაშვილი, 64).

10.02.2013. ”ზესტაფონი” - ”დონიი სრემი” (პეჩინცი, სერბეთი) 4-1

21:00 საათი - მატჩი დაიწყო... 3 წუთი - ბრძოლა ძირითადად მოედნის ცენტრში მიმდინარეობს 4 წუთი - სერბთა არაზუსტი დარტყმა 7 წუთი - თამაში თანაბარ ბრძოლაში გრძელდება 9 წუთი - სერბი მაკარიძეზე უხეშობს, ყვითელი 11 წუთი - იმერელთა უშედეგო შეტევა 13 წუთი - უროშ კოშუტიჩის ზუსტი დარტყმა - 0-1. 15 წუთი - ზესტაფონელები გააქტიურდნენ 17 წუთი - ჭანკოტაძის სახიფათო გადაცემას პარტნიორები დრო ვერ გამოეხმაურნენ 18 წუთი - პირისპირ გასულ სარდალიშვილს მეკარემ აუღო 20 წუთი - კუთხური "ზესტაფონის" კართან 22 წუთი - სერბებმა ჯარიმას შეასრულეს - კუპატაძე ადგილზეა 25 წუთი - თორნიკე გრიგალაშვილი თამაშგარეში აღმოჩნდა 27 წუთი - თორნიკე კაპანაძის უზუსტესი შორეული დარტყმა 1-1 30 წუთი - ბრძოლა ისევ მოედნის ცენტრში მიმდინარეობს 32 წუთი - ჭანკოტაძის სახიფათო საჯარიმო ოდნავ არაზუსტია 33 წუთი - ჭანკოტაძის კიდევ ერთი არაზუსტი საჯარიმო 37 წუთი - სერბები საბანაძის წინააღმდეგ უხეშობენ, მოედანზე ზესტაფონელთა სამედიცინო შტაბი შედის 39 წუთი - ბურთს ზესტაფონელები აკონტროლებენ 42 წუთი - მაკარიძე მოედნის ცენტრში ჯარიმდებიან 43 წუთი - კუთხური სერბთა კართან 45 წუთი - ნიკა საბანაძის ზუსტად შესრულებული ჯარიმა - 2-1 პირველი ტაიმი დასრულდა... 46 წუთი - დაიწყო მეორე ტაიმი 48 წუთი - შეხვედრა თანაბრად მიმდინარეობს 50 წუთი - სერბთა ფლანგიდან ჩაწოდებას კუპატაძე დაეუფლა 53 წუთი - პირველი ცვლილება ზესტაფონელთა რიგებში 57 წუთი - კაპანაძე სერბთა საჯარიმოში წაიქცა, მსაჯის სასტვენი დუმს 60 წუთი - სერბთა შეტევის უშედეგო მცდელობა 63 წუთი - საბანაძის დარტყმას სერბთა გოლკიპერი ეუფლება 64 წუთი - 8 ცვლილება იმერელთა რიგებში 67 წუთი - ზესტაფონელები მეტოქის ნახევარზე "დასახლდნენ" 70 წუთი - თამაშის მსვლელობას ქართველები აკონტროლებენ 72 წუთი - ზესტაფონელთა შეტევა არაზუსტი დარტყმით დასრულდა 75-76 წუთი - სერბებმა ზედიზედ სამი კუთხურს ჩამოაწოდეს - კუპატაძის სეივი 77 წუთი - ქართველთა შეტევა ვახტანგ ჭანტურიშვილის გოლით დასრულდა - 3-1 79 წუთი - ყვითელი ფერეირას 81 წუთი - კუთხური "დონიი სრემის" კართან 83 წუთი - სახიფათო ჯარიმა სერბთა შესრულებით - კუპატაძე ადგილზეა 86 წუთი - ფანცულაია ოფსაიდში აღმოჩნდა 88 წუთი - ღონღაძის პასი და დიმიტრი ტატანაშვილის პირველი გოლი იმერელთა რიგებში - 4-1 90 წუთი - ქართველთა შეტევის უშედეგო მცდელობა მატჩი დასრულდა...

შემდეგ ამხანაგურ მატჩს ზესტაფონელები 13 თებერვალს ოდესის "ჩერნომორეცის"  წინააღმდეგ გამართავენ.