07.02.2014

ამხანაგური მატჩი ჩეხურ "პრშიბრამთან"

2014 წლის 7 თებერვალს თურქულ შეკრებაზე მყოფმა საფეხბურთო კლუბმა ”ზესტაფონმა” რიგით მეორე ამხანაგური შეხვედრა ჩაატარა. ამჯერად ზემოიმერელთა მეტოქე ჩეხეთის რესპუბლიკის "გამბრინუს-ლიგის" წარმომადგენელი საფეხბურთო კლუბი ”პრშიბრამი” გახლდათ.

მხარეების შეთანხმების თანახმად, შეიცვალა ჩეხურ-ქართული დაპირისპირების წინასწარ დაანონსებული დრო და შეხვედრა ადგილობრივი დროით 17:30 (თბილისის დროით - 19:30) საათზე დაიწყო. ჩეხური კლუბი, რომელსაც ადგილობრივი სპეციალისტი პეტრ ჩუჰელი წვრთნის, თავის ქვეყნის მიმდინარე ჩემპიონატში მეთოთხმერე პოზიციაზე იმყოფება.

საინტერესოა, რომ გარკვეული პერიოდის განმავლობაში "პრშიბრამი" პრაღის "დუკლასთან" იყო გაერთიანებული და ჩეხეთის პირველობაზე სწორედ ამ სახელწოდებით ასპარეზობდა. გუნდის უდიდესი წარმატება 1997 წელს უკავშირდება - "დუკლას" სახელით მოასპარეზე პრშიბრამელებმა კლუბის ისტორიაში პირველად თავის ქვეყნის თასის ფინალში იასპარეზეს. დღესდღეობით გუნდში რამდენიმე ლეგიონერი ასპარეზობს, მიმდინარე შეკრებაზე კი გუნდს სომხეთის ეროვნული ნაკრების მარცხენა მცველი ლევონ ჰაირაპეტიანი შეუერთდა,

შეხვედრა ზესტაფონელთა უპირატესობით წარიმართა და უკვე 12-ე წუთზე ეს უპირატესობა გატანილ გოლში აისახა - შეტევის მარცხენა ფლანგიდან ლევან შარიქაძის ზუსტ გადაცემას ჩეხთა საჯარიმოს ხაზიდან რევაზ გეწაძის ძლიერი და აუღებელი დარტყმა მოჰყვა.

თამაში ამის შემდეგაც ქართველთა უპირატესობით მიმდინარეობდა, თუმცა ანგარიშის შეცვლის ყველაზე დასამახსოვრებელი შანსი ტაიმის ბოლოს პრშიბრამელებს მიეცათ - ჩეხთა შემტევმა ლუკაშ შტრატილმა ბურთი რენე ფერეირას აართვა (მატჩზე მყოფი ბევრი სპეციალისტის აზრით, წესების დარღვევით) და ზესტაფონელთან მეკარესთან პირისპირ დარჩა, თუმცა სერბმა ბოიან პავლოვიჩმა თავის გუნდი აშკარა გოლს გადაარჩინა.

მეორე ტაიმში ზესტაფონელთა შემადგენლობა მნიშვნელოვნად გადასხვაფერდა. თამაში ორმხრივ შეტევებში წარიმართა და მეტოქეთა კართან მომენტებიც უფრო ხშირად იქმნებოდა. გოლის გატანის მშვენიერი შესაძლებლობა მიეცა ნიკა საბანაძეს, რომელმაც "პრშიბრამის" დაცვასა და გოლკიპერს თავბრუ დაახვია და კარშიც ზუსტად დაარტყა, თუმცა ჩეხთა მცველმა იაკუბ იუგაშმა მოასწრო კარის ხაზიდან ბურთის გატანა. ამის შემდეგ, აზიზისა და ტომაშ პილიკის დარტყმების შემდეგ ქართველთა კართანაც შეიქმნა ორი სახიფათო მომენტი, მაგრამ ბოიან პავლოვიჩი დღეს ძალიან დამაჯერებლად გამოიყურებოდა

ზესტაფონელებს ანგარიშის გაზრდა ისევ შეეძლოთ, თუმცა მეკარესთან პირისპირ დარჩენილ მიხეილ სარდალიშვილს მიზანმა უმტყუნა. ბოლოს ჩეხებმა მატჩის გადასარჩენად კი გაიწიეს, თუმცა იმერლებმა თავი დინჯად და მშვიდად დაიცვეს და შეხვედრა ლოგიკურ გამარჯვებამდე მიიყვანეს - 1-0.

ზესტაფონელები დღევანდელ შეხვედრას ასეთი შემდგენლობით დაიწყებენ: პავლოვიჩი, ღონღაძე (თორნიკე გრიგალაშვილი, 46), ფერეირა (თედორე გრიგალაშვილი, 46), ჭელიძე (ენდელაძე, 63), გურული (გაგოშიძე, 72), შარიქაძე (აჯურუ, 46), ჭანტურიშვილი (კაკუშაძე, 72), გეწაძე (სარდალიშვილი, 46), კუხიანიძე (ჭანკოტაძე, 63), ტატანაშვილი (კაპანაძე, 63), ფანცულაია (საბანაძე, 46).

შემდეგ ამხანაგურ მატჩს ზესტაფონელები 10 თებერვალს სერბული "დონიი სრემის"  წინააღმდეგ გამართავენ. წინასწარი შეთანხმების მიხედვით, მატჩის დაწყება ადგილობრივი დროით 19:00 საათზე იგეგმება. 

07.02.2013. ”ზესტაფონი” - ”პრშიბრამი” (პრშიბრამი, ჩეხეთი) 1-0

19:32 საათი - მატჩი დაიწყო... 3 წუთი - შარიქაძის სახიფათო დარტყმა 5 წუთი - მოედანზე ბურთზე კონტროლისთვის დიდი ბრძოლა გაჩაღდა 8 წუთი - ბურთს ძირითადად ქართველები აკონტროლებენ 9 წუთი - ჩეხები თამაშგარე მდგომარეობაში აღმოჩნდნენ 10 წუთი - ჭანტურიშვილის სახიფათო დარტყმა 11 წუთი - სახიფათო დარტყმა პავლოვიჩის კარის მიმართულებით 12 წუთი - შარიქაძის ფლანგიდან პასის შემდეგ რევაზ გეწაძემ ანგარიში გახსნა - 1-0 14 წუთი - ჩეხები შარიქაძეზე ჯარიმდებიან 16 წუთი - ბურთს ქართველები აკონტროლებენ 18 წუთი - რენე დაზღვევაძე კარგად თამაშობს 20 წუთი - ზესტაფონელები თამაშგარე მდგომარეობაში აღმოჩნდნენ 23 წუთი - ბურთი ძირითადად მოედნის ცენტრში ტრიალებს 25 წუთი - მოედნის ცენტრთან ახლოს ჩეხები აუტს ჩამოაწდოებენ 27 წუთი - კუხიანიძე-ღონღაძის კომბინაცია, თუმცა ჩეხი მცველები ყურაღებით თამაშობენ 30 წუთი - ბურთს ისევ ქართველები აკონტროლებენ 31 წუთი - რენესთან ორთაბრძოლისას ჩეხი მეკარესთან პირისპირ რჩება - პავლოვიჩის მშვენიერი სეივი 33 წუთი - მოედნის ცენტრთან ახლოს იმერლები აუტს ჩამოაწდოებენ 35 წუთი - კუთხური "ზესტაფონის" კართან 37 წუთი - კიდევ ერთი კუთხური "ზესტაფონის" კართან 38 წუთი - გურულის შორეული არაზუსტი დარტყმა 40 წუთი - ტაიმის ბოლოს ჩეხები გააქტიურდნენ, თუმცა ქართველთა მცველბიც ყურადღებით თამაშობენ 42 წუთი - თამაშმა მოედნის ცენტრთან ახლოს გადაინაცვლა 44 წუთი - ქართველბი მეტოქეთა კარის სიახლოვეს აქტიურობენ პირველი ტაიმი დასრულდა... 46 წუთი - დაიწყო მეორე ტაიმი, 4 ცვლილება "ზესტაფონის" რიგებში 48 წუთი - საბანაძე პირისპირ გავიდა, მეკარე მოატყუა, თუმცა მცველმა ბურთი კარის ხაზიდან გამოიტანა 50 წუთი - ჯარიმა ქართველთა კართან - პავლოვიჩი საიმედოა 52 წუთი - ჩეხები უხეშობენ - ყვითელი 53 წუთი - ტატანაშვილი თამაშგარე მდგომარეობაში აღმოჩნდა 54 წუთი - ყვითელი ჭელიძეს 55 წუთი - ჩეხები საბანაძეს ეუხეშებიან 57 წუთი - ჯარიმა ქართველთა კართან - პავლოვიჩი მშვიდად ეუფლება ბურთს 58 წუთი - ჩეხთა კიდევ ერთი ყვითელი 60 წუთი - ზესტაფონელები მოედნის ცენტრთან ახლოს ჯარიმდებიან 61 წუთი - მაღალი ჩაწოდება პავლოვიჩის იოლი ნადავლია 63 წუთი - ზესტაფონელებმა ისევ ცვლილების მიმართეს 67 წუთი - შეცვლა "პრშიბრამის" რიგებში 68 წუთი - სარდალიშვილი მეკარესთან პირისპირ გავიდა და ბურთი კარს ააცილა 70 წუთი - ჩეხები მოედნის ცენტრთან ახლოს ჯარიმდებიან 72 წუთი - ჯარიმა ქართველთა კართან - მცველები მშვიდად თამაშობენ 74-78 წუთი - თამაში ძირითადად მოედნის ცენტრთან ახლოს მიმდინარეობს 80 წუთი - ჩეხთა შეტევის მცდელობა აჯურუმ შეაჩერა 81 წუთი - "პრშიბრამის" კონტიერიში - პავლოვიჩი ისევ საიმედოა 83 წუთი - კუთხური "ზესტაფონის" კართან 85 წუთი - "ზესტაფონის" კარგი შეტევა, თუმცა გადამწვეტი დარტყმა დაგვიანდა 87 წუთი - ჩეხები მოედნის ცენტრთან ახლოს ჯარიმდებიან 89 წუთი - ბურთს "ზესტაფონი" აკონტროლებს 90 წუთი - ჩეხთა შეტევის უშედეგო მცდელობა მატჩი დასრულდა...