22.11.2013

მორიგი დერბის წინათქმა

ზურაბ იონანიძე "ტორპედოს" კარში გატანილ გოლს ზეიმობს

საფეხბურთო კლუბი ”ზესტაფონი” მორიგი მატჩისთვის ემზადება. 24 ნოემბერს, საქართველოს XXV ეროვნული ჩემპიონატის მეცამეტე ტურში მორიგი იმერული დერბი გაიმართება - ქუთაისის ცენტრალური სტადიონი ადგილობრივი "ტორპედოსა" და საფეხბურთო კლუბ ”ზესტაფონის” რიგით ოცდამეორე საჩემპიონატო დუელს უმასპინძლებს.

საფეხბურთო კლუბ "ზესტაფონსა" და ქუთაისის "ტორპედოს" შორის დღემდე გამართულ 21 საჩემპიონატო მატჩში 9-ში გაიმარჯვეს ზესტაფონელებმა, 5 დასრულდა ფრედ, 7 კი მოიგეს ქუთაისელებმა. გატანილი და გაშვებული ბურთების სხვაობა კი სადღეისოდ საყაიმოა - 20:20.

ფეხბურთის გულშემატკივარს კარგად ახსოვს იმერული "ჯახები" დავით ყიფიანის სახელობის ეროვნული თასის გათამაშებაშიც. აქაც მცირე უპირატესობა ზესტაფონელების მხარესაა - სადღეისოდ გამართულ 5 სათასო შეხვედრაში მარგველებმა იმარჯვეს 2-ში, ასევე 2 მატჩი დასრულდა ფრედ, ქუთათურებმა კი მხოლოდ 1-ხელ გაიმარჯვეს; ბურთების სხვაობა 5:3 ”ზესტაფონის” სასარგებლოდ.

აღნიშვნის ღირსია ის, რომ საფეხბურთო კლუბ "ზესტაფონის" მთავარი მწვრთნელის თანამდებობაზე ახლახანს დაბრუნებული გია გეგუჩაძე ზემოიმერელთა რიგებში დაბრუნებამდე 2 სეზონი სწორედ "ტორპედოს" ხელმძღვანელობდა და ქუთათურებს ბრინჯაოს მედლების ორი კომპლექტიც მოაპოვებინა. აქვე გეტყვით იმასაც, რომ ქუთაისელთა კარში ზესტაფონელთაგან სხვაზე ხშირად ზურაბ იონანიძეს გაუტანია - იონას ანგარიშზე 6 გოლია.

ქუთაისის "ტორპედოსთან" კვირას, 24 ნოემბერს გასამართი შეხვედრა, რომელსაც თბილისელი ფიფას არბიტრი დავით ხარიტონაშვილი მოემსახურება, 16:00 საათზე დაიწყება და ამ მატჩის პირდაპირი რეპორტაჟი ტელეკომპანია "რიონის" ეთერში გადაიცემა.