16.08.2013

მორიგი იმერული დერბის მოლოდინში

18 აგვისტოს საფეხბურთო კლუბი ”ზესტაფონი” ეროვნული პირველობის მორიგ მატჩს გამართავს. საქართველოს XXV ეროვნული ჩემპიონატის მეორე ტურში მორიგი იმერული დერბი გაიმართება - დავით აბაშიძის სახელობის სტადიონი ადგილობრივი ”ზესტაფონის” და ქუთაისის საფეხბურთო კლუბ "ტორპედოს" რიგით ოცდამეერთე საჩემპიონატო დუელს უმასპინძლებს.

საფეხბურთო კლუბ "ზესტაფონსა" და ქუთაისის "ტორპედოს" შორის დღემდე გამართულ 20 საჩემპიონატო მატჩში 9-ში გაიმარჯვეს ზესტაფონელებმა, 5 დასრულდა ფრედ, 6 კი მოიგეს ქუთაისელებმა. გატანილი და გაშვებული ბურთების სხვაობაში მცირე უპირატესობას ზემოიმერელი ფეხბურთელები ფლობენ - 18:17.

ზესტაფონელ და ქუთაისელ ქომაგს კარგად ახსოვს შიდაიმერული "გარჩევები" დავით ყიფიანის სახელობის ეროვნული თასის გათამაშებაშიც. აქაც მცირე უპირატესობა ზესტაფონელების მხარესაა: სადღეისოდ გამართულ 5 სათასო შეხვედრაში მარგველებმა იმარჯვეს 2-ში, ასევე 2 მატჩი დასრულდა ფრედ, ქუთათურებმა კი მხოლოდ 1-ხელ გაიმარჯვეს; ბურთების სხვაობა 5:3 ”ზესტაფონის” სასარგებლოდ.

ქუთაისის "ტორპედოსთან" კვირას, 18 აგვისტოს, გასამართი შეხვედრა 19:00 საათზე დაიწყება და მას სირიელი ფიფას არბიტრი აბდულა ბასლეჰლო განსჯის. მანამდე კი ერთმანეთს იმერული კლუბების დუბლშემადგენლობები დაუპირისპირდებიან - "ზესტაფონისა" და "ტორპედოს" მეორე გუნდების მატჩს ზესტაფონელთა ბაზა 17 აგვისტოს (17:00 საათზე ) უმასპინძლებს.