ელიტრაუნდი, გამარჯვება და ავთო ენდელაძის გოლი

2013 წლის 26 მაისს საქართველოს ცხრამეტწლამდელთა ნაკრებმა ბელგიის სამეფოში მიმდინარე ელიტრაუნდის მეორე მატჩში საოცარ, უკომპრომისო და დაძაბულ ბრძოლაში შოტლანდიის ნაკრები ცხრაკაციანი შემადგენლობით დაამარცხა და ბოლო მატჩს დიდი იმედებით ელოდება.

მატჩის პირველი ტაიმი ორმხრივ შეტევებში მიმდინარეობდა და 28-ე წუთზე ანგარიში ნიკა კაჭარავამ გახსნა. პირველ ტაიმში მეტი გოლი აღარ გასულა და გუნდები შესვენებაზე ასე გავიდნენ.

მთავარი და ძალიან დრამატული მოვლენები მეორე ტაიმში განვითარდა. გუნდებმა უხეშობას უმატეს და მატჩის ესპანელმა არბიტრმაც უხვად არიგა ყვითელ-წითელი ბარათები. თუმცა, მანამდე, 43-ე წუთზე ჩვენი გუნდი უკვე კაცნაკლული იყო დავით მთივლიშვილის გაძევების გამო. 54-ე წუთზე, მსაჯმა ჩვენს კარში თერთმეტმეტრიანი დანიშნა, თუმცა ახალგაზრდა ქართველთა მეკარემ დარტყმა მოიგერია.

58-ე წუთზე კი, არბიტრმა ქართველთა კაპიტანი - ბაჩანა არაბულიც მთივლიშვილის გზას გაუყენა და სიტუაცია ქართველთათვის თითქოს გამოუვალი გახდა. მაგრამ ამის შემდეგ დაიწყო თუ დაიწყო - 66-ე წუთზე ჯერ ბუდუ ზივზივაძემ აიღო შოტლანდიელთა კარი. 72-ეზე კი საფეხბურთო კლუბ "ზესტაფონის" ნახევარმცველმა ავთო ენდელაძემ მესამე ბურთიც გაუტანა „მამაც გულებს“ და 9 კაცით მოთამაშე ქართველებმა აბსოლუტურად უიმედო მდგომარეობაში ჩააგდეს მეტოქე. შოტლანდიელებმა 76-ე წუთზე ერთი ბურთის გაქვითვა კი მოახერხეს, თუმცა ქართველებმა გამარჯვება მაინც შეინარჩუნეს - 3-1.

შოტლანდიელთა ძლევით საქართველოს ცხრამეტწლამდელებმა ევროპის პირველობის ფინალური ეტაპისაკენ დიდი ნაბიჯი გადადგეს. ევროპის ჩემპიონატის გადამწყვეტ ეტაპზე მხოლოდ ჯგუფის გამარჯვებული გადის. ამ დროისათვის ჯგუფს ერთპიროვნულად სწორედ საქართველო ლიდერობს და გადამწყვეტ მატჩს 29 მაისს მასპინძელ ბელგიასთან გამართავს. სამწუხაროდ, ტურნირის მასპინძლებთან გასამართ შეხვედრაში დისკვალიფიკაციის გამო გუნდს ვეღარ დაეხმარება ავთო ენდელაძე, სამაგიეროდ მწყობრს უბრუნდება ნაკრებში მარგველთა კიდევ ერთი წარმომადგენელი - ტრავმამოშუშებული გურამ სამუშია.

მომზადებულია www.gff-ge-ს პუბლიკაციის მიხედვით