2013 წლის 9 თებერვალს საფეხბურთო კლუბმა ”ზესტაფონმა” თურქულ შეკრებაზე მეოთხე ამხანაგური მატჩი ჩაატარა. ამჯერად საქართველოს ჩემპიონის მეტოქე პოლონეთის ექსტრაკლასას წარმომადგენელი, ქალაქ გდანსკის წარმომადგენელი საფეხბურთო კლუბი ”ლეხია” გახლდათ.
დღევანდელი შეხვედრა ქალაქ სიდეში გაიმართა და ადგილობრივი დროით 15:00 (თბილისის დროით - 17:30) საათზე დაიწყო. პოლონური კლუბი, რომელსაც ადგილობრივი სპეციალისტი ბოგუსლავ კაჩმარეკი წვრთნის, პოლონური ფეხბურთის გრანდებს არ მიეკუთვნება, თუმცა გემთმშენებელთა სახელგანთქმული პროფკავშირი "სოლიდარნოსტისა" და ამ ორგანიზაციის ხელმძღვანელისა და შემდგომში პოლონეთის პრეზიდენტის ლეხ ვალენსას მშობლიური ქალაქის გუნდი თავს 1983 წელს მოპოვებული ქვეყნის თასითა და სუპერთასისთ იწონებს. პოლონეთის მიმდინარე ჩემპიონატში გდანსკის კლუბი მეექვსე ადგილზეა მოკალათებული და გუნდის ღირსებას, პოლონელ ფეხბურთელებთან ერთად, ბრაზილიელი და კონგოელი ლეგიონერები იცავენ.
გდანსკელებთან შეხვედრაში ზესტაფონელებს ვერ დაეხმარა თედორე გრიგალაშვილი, რომელსაც ტრავმა აწუხებს. გარდა ამისა, კიდევ რამდენიმე ფეხბურთელი იმერელთა დამრიგებელმა კახა კაჭარავამ დაასვენა...
იმერელთა წინა მატჩის მსგავსად, დღევანდელი შეხვედრაც ორი განსხვავებული ნაწილისაგან შედგებოდა. თუკი პირველ ტაიმში უკეთ ქართველები გამოიყურებოდნენ და ეს უპირატესობა თორნიკე გორგიაშვილის კარგი გადაცემის შემდეგ თორნიკე აფციაურის მიერ გატანილ გოლშიც აისახა, შეხვედრის მეორე ნახევარში უკეთ გდანსკელები გამოიყურებოდნენ - რამდენიმე ეპიზოდში საიმედოდ ითამაშა მარგველთა დაცვამ, როინ კვასხვაძესაც უფრო ხშირად უხდებოდა თამაშში ჩართვა... საქმე თითქოს "ზესტაფონის" გამარჯვებისაკენ მიდიოდა, თუმცა მატჩის არბიტრის მიერ დამატებულ მესამე წუთზე პოლონელებმა სწრაფი კომბინაცია გათამაშეს და ვოიცეხ ზისკამ დღევანდელი დაპირისპირების საბოლოო ანგარიში დააფიქსირა. დასანანი ფრე 1-1.
