"ბენდელას თასის" სასტარტო შეხვედრა

ფოტო საიტიდან www.worldsport.ge

26 იანვარს "ბენდელას თასის" ტრადიციული, 22-ე გათამაშება დაიწყო. აფხაზეთის ომის გმირის, ზაზა ბენდელიანის ხსოვნისადმი მიძღვნილი პირველი ტურნირი 1993 წელს გაიმართა. მას შემდეგ "ბენდელას თასი" პოპულარული ტურნირი გახდა: ბავშვებისა და დიდებს შორის მინი-ფეხბურთის პაექრობებს თბილისის სპორტის სასახლეში უამრავი მაყურებელი ესწრებოდა. მეოთხე წელია, რაც ტრადიციულ გათამაშებას მესამე შეჯიბრიც დაემატა და სტანდარტულ მოედანზეც იმართება. ახალი ფორმატის ტურნირს უმაღლესი და პირველი ლიგის გუნდები სეზონისთვის მოსამზადებლად იყენებენ.

წლევანდელი "ბენდელას თასის" გათამაშებაში გამარჯვებისთვის იბრძოლებს 12 გუნდი, რომლებიც სამ ჯგუფში ტერიტორიული პრინციპით გადანაწილდნენ. თამაშები გაიმართება არა ერთ რომელიმე კონკრეტულ სტადიონზე, არამედ გუნდებისთვის მოსახერხებელ ქალაქებსა და არენებზე. ზოგიერთი გუნდი ძირითადი შემადგენლობით მიიღებს მონაწილეობას, ზოგიც - დუბლებით ან შერეული შემადგენლობებით.

მეორე და მესამე ჯგუფიდან მეოთხედფინალში სამ-სამი გუნდი გავა, ერთიდან - 2. მეოთხედფინალები 12-13 თებერვალს გაიმართება, ნახევარფინალები - 16 თებერვალს, ტურნირის გამარჯვებული კი 21 თებერვალს "ბენდელას" სტადიონზე გამოვლინდება.

* * *

დღეს, 26 იანვარს, "ბენდელას თასის" ოცდამეორე გათამაშების პირველი ტურის მატჩში, რომელიც სამტრედიაში გაიმართა, საფეხბურთო კლუბ "ზესტაფონის" მეორე გუნდი პირველლიგელ ხონის "იმერეთს" დაუპირისპირდა. მატჩი, რომელშიც მარგველ დუბლიორთა დამრიგებლებმა გასინჯვაზე მყოფი რამდენიმე ფეხბურთელიც ათამაშეს, დასრულდა ზემოიმერელთა გამარჯვებით ანგარიშით 2-0. გამარჯვებულთა რიგებში გატანილი გოლებით თავი ბადრი კვარაცხელიამ და ნოდარ გაჩეჩილაძემ გამოიჩინეს.

,,ზესტაფონი-2“: ტურავა, ჯიქიძე, რობაქიძე, შალამბერიძე (წურწუმია, 46), კიკნაველიძე (კალანდაძე, 46), გაჩეჩილაძე, მუმლაძე (ჩუბინიძე, 46), ომარ გრიგალაშვილი (ბეგლარიშვილი, 46), ეგუტიძე (ჭეიშვილი, 55), კვარაცხელია, კვერნაძე (იონანიძე, 67).