19.11.2012

დუბლიორთა ტურნირის მეთხუთმეტე ტური

2012 წლის 19 ნოემბერს გაიმართა საქართველოს XXIV ეროვნული ჩემპიონატის უმაღლესი ლიგის გუნდების დუბლიორთა ტურნირის მეთხუთმეტე ტურის მატჩები. საფეხბურთო კლუბ ”ზესტაფონის” მეორე გუნდი ქობულეთში ბათუმის საფეხბურთო კლუბ "დინამოს" რეზერვისტებს ესტუმრა.

დღევანდელი შეხვედრა "ზესტაფონმა" ასეთი შემადგენლობით ჩაატარა: მეშველიანი, თორნიკე გრიგალაშვილი, რობაქიძე, შალამბერიძე, გაგოშიძე, გაჩეჩილაძე (ჯიქიძე, 89), სამუშია, სარდალიშვილი (ეგუტიძე, 86), შარვაძე, კიკნაძე, კვერნაძე (ომარ გრიგალაშვილი, 90).

ზესტაფონელებმა მატჩი აქტიურად დაიწყეს და უკვე 7-ე წუთზე, მიშიკო სარდალიშვილის ზუსტი გადაცემის შემდეგ, ოთარ კვერნაძემ სტუმრები წინ გაიყვანა. სტუმრები დაწინაურების შემდეგაც უკეთ გამოიყურებოდნენ, მაგრამ 16-ე წუთზე მასპინძლებს რიკოშეტი მიეშველა და კახა მეშველიანთან პირისპირ ეულად დარჩენილმა აივენგო აბუსელიძემ ანგარიში საყაიმო გახადა. 25-ე წუთზე, ბერდია შარვაძის მეტოქის საჯარიმოში წაქცევის გამო, მასპინძელთა კარში დაინიშნა პენალტი, რომელიც გოლად თავად დაზარალებულმა აქცია. ამას დინამოელთა გააქტიურება მოჰყვა და აჭარული გუნდის კოტდ'ივუარელი ლეგიონერის ტიერი კლოვისის აქტიურობის შედეგად 38-ე წუთზე ანგარიში ისევ გათანაბრდა. კიდევ ორი წუთის შემდეგ აფრიკელმა ფეხბურთელმა 11-მეტრიანიც მოინადირა, თუმცა აივენგო აბუსელიძის დარტყმული კარს დიდი მანძილით ასცდა.

მეორე ტაიმის დებიუტი ისევ იმერელთა აქტიურობით დაიწყო და 56-ე წუთზე, გუგა კიკნაძის ზუსტი გადაცემის შემდეგ, ოთარ კვერნაძემ სტუმრები კიდევ ერთხელ დააწინაურა. 71-ე წუთზე გურამ სამუშიას გოლის ჯერიც დადგა, ასისტენტობა კი მას მალხაზ გაგოშიძემ გაუწია. მასპინძლებმა კიდევ ერთხელ გაიბრძოლეს და 77-ე წუთზე ანგარიში მინიმუმამდე შეამცირეს - აივენგო აბუსელიძემ დღევანდელ შეხვედრაში მეორე გოლი გაიტანა. მატჩის დასკვნით ნაწილში სტუმრები მშვიდად აკონტროლებდნენ მოედანზე მიმდინარე მოვლენებს, მეტიც, არბიტრის მიერ კომპენსირებულ ბოლო წუთზე ბერდია შარვაძემ კიდევ ერთხელ აიღო ბათუმელთა კარი. ზესტაფონელთა გამარჯვება ანგარიშით 5-3.

დუბლიორთა ტურნირის სატურნირო ცხრილი