საბჭოთა პერიოდის საქართველოს მთავარ გუნდთან ქალაქ ზესტაფონის წარმომადგენელი კლუბების დაპირისპირებათა ისტორია რიგით მეორე ეროვნული ჩემპიონატიდან მოყოლებული იწყებს ათვლას... 1991-2003 წლებში გამართულ მატჩებში ”მარგვეთმა” და ”მეტალურგმა” ვერ მოახერხეს თბილისელთათვის დიდი წინააღმდეგობის გაწევა, თუმცა, აღსანიშნავია ისიც, რომ დინამოელთა ულაპარაკო დომინირების პირობებშიც ("დინამომ" გასული საუკუნის 90-იან წლებში ჩატარებული ყველა ეროვნული ჩემპიონატი მოიგო) კი ზესტაფონის "მარგვეთმა" თბილისელები ორ შეხვედრაში მაინც დაამარცხა.

 

რაც შეეხება დინამოელებთან საფეხბურთო კლუბ "ზესტაფონის" "ურთიერთობებს" - სადღეისოდ გუნდებმა ერთმანეთში 25 შეხვედრა გამართეს. ამ მატჩებში 12-ში გაიმარჯვეს თბილისელებმა, 6 დასრულდა ფრედ, 7 კი მოიგეს ზესტაფონელებმა. გატანილი და გაშვებული ბურთების სხვაობაშიც მცირე უპირატესობა სწორედ თბილისელ ფეხბურთელებს გააჩნიათ - 31:22.

 

საკმაოდ ხშირი გახლდათ თბილისურ-ზესტაფონური "ჯახები" დავით ყიფიანის სახელობის ეროვნული თასის გათამაშებაშიც. უნდა ითქვას, რომ აქ მცირე უპირატესობას იმერლები ფლობენ: სადღეისოდ გამართულ 8 სათასო შეხვედრაში 3-ჯერ იმერლებმა იმარჯვეს, 2-ჯერ დედაქალაქელებმა, 3 მატჩიც დასრულდა ფრედ, ბურთების სხვაობა 5:4 ”ზესტაფონის” სასარგებლოდ. ერთხელაც გუნდები სუპერთასისათვის მატჩში შეხვდნენ ერთმანეთს და ის შეხვედრა თბილისელთა მინიმალური გამარჯვებით (1-0) დასრულდა.

 

საკმაოდ საინტერესოა ის, რომ ზესტაფონელთაგან დინამოელთა კარში სხვაზე ხშირად ჯაბა დვალს გაუტანია - დღესდღეობით სწორედ თბილისური კლუბის ფორვარდს თავის დროზე "დინამოს" კარში 4 გოლი აქვს გატანილი. 2-2-ჯერ თბილისელთა კარის ბადე ერთბაშად 5 ზესტაფონელ ფეხბურთელს (ზურაბ იონანიძე, ბექა გოცირიძე, თორნიკე გორგიაშვილი, ზაალ ელიავა და ნიკოლოზ გელაშვილი) შეურხევია...

 

საფეხბურთო კლუბ "დინამოსთან" ხვალ გასამართი შეხვედრა 18:00 საათზე დაიწყება. ამ მატჩის პირდაპირი ტელერეპორტაჟი საზოგადოებრივი მაუწყებლის ”პირველ არხზე” გადაიცემა.