09.10.2012

როინ კვასხვაძე ფინეთიდან: "რთული იქნება, მაგრამ უნდა შევძლოთ!"

საქართველოს ეროვნული ნაკრები ფინეთშია და მასპინძლებთან სათამაშოდ ემზადება. გუნდთან ერთადაა საფეხბურთო კლუბ "ზესტაფონის" მეკარე როინ კვასხვაძე. შეაძლოა, 12 ოქტომბერს როინი სასტარტო შემადგენლობაშიც ვიხილოთ ფინეთთან მატჩში. კვასხვაძეს გუშინ ჰელსინკიში დავუკავშირდით.

- როგორ იმგზავრეთ, კარგად მოეწყვეთ?

- ძალიან კარგად ვიმგზავრეთ და გუშინ და დღეს ვივარჯიშეთ კიდეც. მშვენიერ პირობებში ვართ. სავარჯიშო მინდორიც კარგია. ასე რომ, მონდომებით ვემზადებით ფინელებთან მატჩისათვის.

- ტრავმა ხომ არავის აწუხებს?

- არა, ყველაფერი კარგადაა. დღეს საღამოს ნაკრები სრულად შეიკრიბება. ისეთი ორი მატჩი გველის, რომ ტრავმები ყველანაირად უნდა ავირიდოთ თავიდან.

- ჰელსინკიში წინასამატჩო აჟიოტაჟი თუ იგრძნობა?

- ჟურნალისტების მხრიდან ყურადღებას ვგრძნობთ. ვარჯიშზე ტელევიზიაც იყო მოსული და ქალაქში აფიშებსაც მოვკარი თვალი. ასე რომ, აჟიოტაჟი ნამდვილად იგრძნობა.

- არის შანსი, თემურ ქეცბაიამ სასტარტო შემადგენლობაში დაგაყენოს. მზად ხარ ამისათვის?

-  მთავარი მწვრთნელის გადასაწყვეტია, ვის ათამაშებს - მე, ნუკრი რევიშვილს თუ ომარ მიგინეიშვილს. მე ყოველთვის მზად ვარ ნაკრებში სათამაშოდ და ეროვნულ გუნდში გატარებული თითოეული წუთი უბედნიერესია ჩემთვის.

- როგორ თამაშს ელი 12 ოქტომბერს?

- ფინეთის ნაკრები ძალიან ორგანიზებული, შეკრული გუნდია. თან შინ თამაშობს. რთული იქნება წარმატების მიღწევა, მაგრამ ეს აუცილებლად უნდა შევძლოთ.