08.09.2012

სპარინგ-მატჩი ჩემპიონის ბაზაზე

საქართველოს ეროვნული ჩემპიონატის უმაღლესი ლიგის ბინადრებმა სანაკრებო პაუზით ისარგებლეს და მიმდინარე წლის 8 სექტემბერს ამხანაგური მატჩები გამართეს. ზესტაფონელთა ბაზაზე გამართულ შეხვედრაში ქვეყნის ორგზის ჩემპიონი მარტვილის საფეხბურთო კლუბ ”მერანს” დაუპირისპირდა.

გუნდებმა ასეთი შემადგენლობებით იასპარეზეს:

”ზესტაფონი”: მამალაძე (მეშველიანი, 61), ელიავა, გაგოშიძე, კაჭკაჭიშვილი (შალამბერიძე, 46), ღონღაძე (თორნიკე გრიგალაშვილი, 64), მენთეშაშვილი (ჭანტურიშვილი, 46), ბაბუნაშვილი (შარვაძე, 67), აფციაური (კვერნაძე, 68), მილხრაუმი (სარდალიშვილი, 46), რაჟამაშვილი (სამუშია, 58), წინამღძვრიშვილი (ღირდალაძე, 46).

”მერანი”: შეროზია (ბერია, 61), მჭედლიშვილი, იობაშვილი (კიკალიშვილი, 61), ჟვანია (ბუკია, 46), ქარქუზაშვილი (გეგია, 61), დიდავა (გაბისონია, 61), ნოზაძე (მელიავა, 61), ფონიავა (ჩხეტიანი, 61), ამბროლაძე (გეგეჭკორი, 46), რეხვიაშვილი (კურტანიძე, 61 (კუჭუხიძე, 80)), ლომია (ტორონჯაძე, 61).

ამ ერთი თვის წინ გამართული ეროვნული ჩემპიონატის პირველი ტურის შეხვედრის მსგავსად, მასპინძლებმა მარტვილელი სტუმრების დამარცხება ახლაც მოახერხეს. მატჩის დებიუტშივე ზესტაფონელებმა ორბურთიანი უპირატესობით დაწინაურება შეძლეს. აღსანიშნავია, რომ ორივე გოლი ჩემპიონთა გერმანელი ლეგიონერის პატრიკ მილხრაუმის შეტევის მარცხენა ფლანგზე კარგ თამაშსა და ზუსტ გადაცემებს მოჰყვა - 4-ე წუთზე გოლი დავით რაჟამაშვილმა გაიტანა, ხოლო 7-ეზე მასპინძელთა უპირატესობა უფრო შთამბეჭდავი შოთა ბაბუნაშვილმა გახადა.

ასეთი დასაწყისის მიუხედავად, "მერანმა" ფარ-ხმალი არ დაყარა და პირველი ტაიმის მიწურულს ანგარიშის "დასველება" მოახერხა - შეხვედრის 34-ე წუთზე მარტვილელი გიორგი რეხვიაშვილის საჯარიმოს მისადგომებიდან ძლიერად დარტყმული მასპინძელთა გოლკიპერ ზურაბ მამალაძისთვის აუღებელი გამოდგა.

ანგარიშში მასპინძელთა ორბურთიანი უპირატესობა მეორე ტაიმის დაწყებისთანავე იქნა აღდგენილი - 47-ე წუთზე მიზანს მიშიკო სარდალიშვილის დარტყმამ მიაღწია. 75-ე წუთზე კი სტუმართა მცველებს ოთარ კვერნაძე გაექცათ და მახვილი კუთხიდან ზუსტი დარტყმით ანგარიში დიდამდეც გაზარდა. ზესტაფონელთა გამარჯვება ანგარიშით 4-1.