გია გეგუჩაძე: “ალბათ, მე დავაკელი რაღაც”

“ზესტაფონის” მთავარმა მწვრთნელმა გია გუგეჩაძემ “მსოფლიო სპორტთან” საუბარში განაცხადა, რომ ევროპის ლიგის ფლეი ოფში ბელგიურ “ბრიუგესთან” შეხვედრაში მისი გუნდი ძალიან დიდ გამოცდილებას მიიღებს.

გია გეგუჩაძე: “კენჭისყრის შედეგით კმაყოფილებაზე რა გითხრათ! “ბრიუგე” კარგი გუნდი და სერიოზული მოწინააღმდეგეა. ყოველ შემთხვევაში, ჩვენ ძალიან დიდ გამოცდილებას მივიღებთ. შესაძლოა, ჯგუფშიც მოვხვდეთ”.

- მაინც რა დააკლდა “ზესტაფონს” “შტურმის” ბარიერის გადასალახად?
- ყოველთვის იმას ვამბობ, რასაც ვფიქრობ. “შტურმის” გავლა შეგვეძლო. ალბათ, მე დავაკელი რაღაც. ავსტრიაში ჩატარებული მატჩით უკმაყოფილო დავრჩი. ვერ ვითამაშეთ ჩვენი ფეხბურთს, რომელიც შედეგს მოგვიტანდა.

- ედიკ საჯაია თუ შეურთდა გუნდს და ევროპის ლიგაზე სათამაშოდ რამდენად მზად არის?
- საჯაიამ გუნდთან ერთად ვარჯიში დაიწყო. უიმედოდ არ ვარ განწყობილი და ალბათ, ევროპის ლიგაზე თამაშს შეძლებს.

- გიორგი ხიდეშელმა ოპერაცია გაიკეთა? რამდენი ხანი მოუნდება რეაბილიტაციას?
- ხიდეშელმა ოპერაცია ბელგიაში გაიკეთა. მას მენისკის გარდა ჯვარედინი იოგიც ჰქონდა დაზიანებული. დასვენება 6-დან 8 თვემდე მოუწევს.

- როგორ ხვდება გუნდი საქართველოს ეროვნულ ჩემპიონატს? სასტარტო ტურის ცენტრალურ შეხვედრაში ქუთაისში “ტორპედოს” ეთამაშებით...
- თუ ნორმალური კლუბი გქვია, ყურადღება, პირველყოვლისა, საკუთარ ჩემპიონატს უნდა მიაქციო. ვემზადებით ამ თამაშისთვის. კიდევ კარგი, რომ შემადგენლობაში ცვლილებების განხორციელების საშუალება გვაქვს და შეგვიძლია, ზოგიერთ ფეხბურთელს დასვენების საშუალება მივცეთ.