ჯაბა დვალი: ”დაჩიას” გოლი სტუმრადაც უნდა გავუტანოთ

როგორც კი ჩემპიონთა ლიგის მეორე საკვალიფიკაციო ეტაპზე ”ზესტაფონის" მეტოქის ვინაობა შევიტყვეთ, მაშინვე შემოგთავაზეთ ”დაჩიას" ყოფილი და იმერელთა ამჟამინდელი თავდამსხმელის, ჯაბა დვალის ინტერვიუ, სადაც მან მოლდოვის ჩემპიონთა ავ-კარგზე იმსჯელა და იმედი გამოთქვა, რომ ყოფილ გუნდთან ბრძოლაში თავს გამოიჩენდა.

ჯაბას იმედები გამართლდა - ”ზესტაფონი"-”დაჩიას" პირველ მატჩში იგი ერთ-ერთი გამორჩეული იყო და კიშინიოველთა კარში გატანილი ორი ეფექტური გოლით "ზესტტაფონს" მომავალი რაუნდისკენ დიდი ნაბიჯი გადაადგმევინა. დღეს ”ლელოს" რესპონდენტი კვლავ დვალია.

- უპირველესად, დუბლს და გამარჯვებას გილოცავთ. რამ განაპირობა მატჩის ასეთი შედეგი?
- მოლოცვისთვის მადლობელი ვარ, მაგრამ ნამდვილად არ მიმაჩნია, რომ გამარჯვებაში განსაკუთრებული წვლილი შევიტანე. ევროთასებს გუნდი კარგი კონდიციებით შეხვდა და ეს წარმატება მოედანზე გასული თითოეული ფეხბურთელის დამსახურებაა. რაღა თქმა უნდა, შესანიშნავად იმუშავა სამწვრთნელო შტაბმა, დიდ მადლობას ვუხდით ჩვენს ერთგულ გულშემატკივრებს, რომლებიც მთელი მატჩის განმავლობაში ერთგულად გვედგნენ მხარში. ძალიან ცუდი იქნება, უეფა ზესტაფონში თამაშს თუ აგვიკრძალავს, ჩვენს სტადიონზე სათამაშოდ სულ სხვა განწყობით გავდივართ ხოლმე.

- ”დაჩიას" კარში გატანილი გოლები ზუსტად ისეთი გამოგივიდა, როგორც ჩაიფიქრე, თუ ყველაფერი ინსტინქტურად გააკეთე?
- თანამედროვე ფეხბურთში ისეთი ტემპია, ფეხბურთელს ფიქრისთვის ძალიან ცოტა დრო აქვს, მაგრამ, ამის მიუხედავად, მაინც მოვასწარი გადაწყვეტილების მიღებაც და მისი სათანადოდ შესრულებაც. ისე კი, ეფექტური მხოლოდ ჩემი კი არა, ნიკა გელაშვილის გოლიც იყო. თანაც, პირველმა ბურთმა მატჩის საბოლოო შედეგში განსაკუთრებული როლი ითამაშა. სწრაფად დაწინაურებამ ფრთები შეგვასხა და ამის შემდეგ საკუთარი უპირატესობის რეალიზება აღარ გაგვჭირვებია.

- რა დაავალა გუნდს მატჩამდე გია გეგუჩაძემ?
- თავიდანვე უნდა დაგვეწესებინა კონტროლი ბურთზე, მოწინააღმდეგის ნახევარზე პრესინგი უნდა გვეთამაშა და სწრაფი გოლის გატანა უნდა გვეცადა. საბედნიეროდ, ამ ამოცანებს თავი წარმატებით გავართვით.

- მეორე ტაიმი ნაკლებად სანახაობრივი გამოდგა.
- გოლის გატანა და უპირატესობის კიდევ უფრო განმტკიცება შესვენების შემდეგაც გვინდოდა, მაგრამ ვეღარ შევძელით. პირველი ტაიმი ისეთ ტემპში ჩავატარეთ, რომ გასაკვირი არ არის, მეორეში იმდენივე რომ ვეღარ მოვახერხეთ. არა უშავს, საწყის 45 წუთში ისეთი უპირატესობა შევიქმენით, რომ წყვილის უდავო ფავორიტებად ვიქეცით. თანაც, რაც მთავარია, დაცვაშიც მაღალ დონეზე ვითამაშეთ და საკუთარი კარი მშრალად შევინახეთ, რაც ევროთასების საშინაო შეხვედრებში ყოველთვის ძალიან მნიშვნელოვანი ფაქტორია.

- მატჩის შემდეგ, ალბათ, ძველ თანაგუნდელებს ელაპარაკე.
- კი, ერთმანეთი თბილად მოვიკითხეთ. ყველანი ძალიან გულდაწყვეტილები იყვნენ, მაგრამ მაინც იმედოვნებენ, რომ კიშინიოვში მდგომარეობას გამოასწორებენ.
იხტიბარი არც იგორ დობროვოლსკიმ გაიტეხა და განაცხადა, შანსი 50/50-ზეაო. ამაში ნამდვილად ვერ დავეთანხმები, მაგრამ ისიც ფაქტია, რომ გარანტირებული ჯერ არაფერი გვაქვს.

- ელოდი, რომ განმეორებით მატჩზე ”ზესტაფონი" ამხელა უპირატესობით გაემგზავრებოდა?
- ამის დიდი იმედი მქონდა, რადგან მეტოქისადმი პატივისცემის მიუხედავად, საფეხბურთო მომზადების დონითაც და ფსიქოლოგიურადაც მზად ვიყავით არა მხოლოდ ამ ბარიერის გადასალახავად, არამედ გაცილებით სერიოზული მიზნებისთვის საბრძოლველად.

- როგორი თამაშია მოსალოდნელი მოლდოვაში?
- ვფიქრობ, საკმაოდ რთული და დაძაბული. მეტოქეს დასაკარგი აღარაფერი აქვს და ფარ-ხმალს იოლად არ დაყრის. დარწმუნებული ვარ, ”დაჩია" აქტიურად შემოგვიტევს და სწრაფი გოლის გატანას ეცდება. დიდი ბრძოლა გველის, მაგრამ საკუთარ შესაძლებლობებში დარწმუნებულები ვართ და შევეცდებით, იქაც დავამტკიცოთ, რომ ”ზესტაფონი" უკეთესი გუნდია.

3:0-ის მიუხედავად, მეც და ჩემი თანაგუნდელებიც კარგად ვაცნობიერებთ, რომ გადაწყვეტილი ჯერ არაფერია და სრული კონცენტრაციით თამაში გვმართებს. ყრუ დაცვაში ჩადგომას ნამდვილად არ ვაპირებთ, გოლი სტუმრადაც უნდა გავიტანოთ, რაც ყველაფერს გადაწყვეტს. კარგი იქნება, თუ სარეიტინგო ქულებს ”დაჩიასთან" საპასუხო მატჩშიც მოვიპოვებთ. ყველანი მხოლოდ ამ შეხვედრაზე ვფიქრობთ და მომდევნო მეტოქეებზეც მხოლოდ ამის შემდეგ ვიმსჯელებთ.