მზადების პირველი ეტაპის ეკვატორთან

მიმდინარე წლის 12 ივნისს საფეხბურთო კლუბმა ”ზესტაფონმა”, რომელიც უეფას ჩემპიონთა ლიგაში სადებიუტო ასპარეზობისათვის მზადებას განაგრძობს. მზადების ზესტაფონში გასამართი ეტაპის პირველი ნაწილი დაასრულა.

დღეს დილით გია გეგუჩაძემ საფეხბურთო კლუბ ”ზესტაფონის” პირველი გუნდის და დუბლშემადგენლობის ფეხბურთელები ორ პირობით გუნდად (”წითლებად” და ”მწვანეებად”) დაჰყო და იმერული კლუბის ბაზაზე ორმხრივი თამაში გაჩაღდა. თავად ამ მატჩის მიმდინარეობის დეტალებს გამოვტოვებთ, მოგახსენებთ მხოლოდ იმას, რომ დღევანდელი ორმხრივი შეხვედრით ზემოიმერლებმა მშობლიურ ქალაქში გასამართი საწვრთნელი შეკრების პირველი ნაწილი დაასრულეს და მცირე ხნით დაისვენებენ.

მზადების იმერული ეტაპის მეორე ნაწილი 14 ივნისს დაიწყება. უნდა ითქვას, რომ სამშაბათს ზესტაფონელებს თემურ ქეცბაიას მიერ ხორვატებთან სპლიტში გამართული მატჩის წინ ეროვნულ ნაკრებში გამოძახებული ექვსეულიც (როინ კვასხვაძე, კახა ალადაშვილი, გიორგი ხიდეშელი, თორნიკე გორგიაშვილი, მურთაზ დაუშვილი და ნიკოლოზ გელაშვილი) შეუერთდება. მანამდე კი ამ ფეხბურთელებს სამედიცინო შემოწმების გავლა მოუწევთ ...