მორიგი იმერული დერბი

2011 წლის 6 აპრილს გაიმართა საქართველოს XXII-ე ეროვნული საფეხბურთო ჩემპიონატის ოცდამერვე ტურის მატჩები. ქუთაისის ცენტრალურ სტადიონზე ეროვნული ჩემპიონატის ლიდერი ”ზესტაფონი” ადგილობრივ საფეხბურთო კლუბ ”ტორპედოს” დაუპირისპირდა.

როგორც მოგეხსენებათ, წინა ტურის მატჩში განვითარებული ცნობილი მოვლენების შედეგად, დღევანდელ შეხვედრაში ზესტაფონელებს ძირითადი შემადგენლობის ერთბაშად სამი ფეხბურთელი (ჯაბა დვალი, მურთაზ დაუშვილი და ნიკოლოზ გელაშვილი) აკლდათ. მარგველთა ფორვარდთა დუეტის არყოფნაში ძირითადი ”დამრტყმელი ძალის” ფუნქცია სტუმართა კიდევ ერთ თავდამსხმელ რატი წინამძღვრიშვილს დაეკისრა.

შეხვედრა სწორედ ისეთი გამოდგა, როგორიც უნდა იყოს დერბი - შეხვედრისათვის განკუთვნილი ოთხმოცდაათივე წუთის განმავლობაში მოედანზე მიმდინარეობდა ორი ღირსეული მეტოქის თავდაუზოგავი ბრძოლა, რომელმაც, საბოლოოდ, გამარჯვებული ვერ გამოავლინა.

იმერული კლუბების დღევანდელ დაპირისპირებაში ორად-ორი აშკარა საგოლე სიტუაცია შეიქმნა და ორივე ქუთაისელთა კართან. ნახსენები ორიდან პირველ ეპიზოდში მეტოქის კარის აღებასთან ახლოს იყო რატი წინამძღვრიშვილი, რომლის ახლო მანძილიდან დარტყმულს ქუთათურთა გოლკიპერი ომარ მიგინეიშვილი დაეუფლა; მეორეში კი რატის ნაცვლად მოედანზე შემოსულ საბა ლომიას შეეძლო თავისი გუნდისათვის გამარჯვების მომტანი გოლის გატანა, თუმცა მისი თავურის შემდეგ ბურთი სულ მცირე მანძილით ასცდა მასპინძელთა კარს. ფრე 0-0.

მატჩის შემდეგ (www.worldsport.ge):

გია გეგუჩაძე ("ზესტაფონი"): "მოსაგებად ვიყავით განწყობილნი, მაგრამ სასურველ მიზანს ვერ მივაღწიეთ. მოედნის საფარი სათანადო მდგომარეობაში არ იყო. შედეგი კი, ვთვლი, რომ სამართლიანი იყო".

გია გიგატაძე ("ტორპედო"): "ზედიზედ რამდენიმე რთული მატჩის ჩატარება გვიწევს. ვფიქრობ, გუნდი ნორმალურად გამოიყურებოდა. მატჩიც, ლოგიკური შედეგით დასრულდა".

	06.04.2011 - ”ტორპედო” (ქუთაისი) - ”ზესტაფონი” 0-0
დაწვრილებით:

საქართველოს XXII ეროვნული ჩემპიონატის ოცდამეცხრე ტურის შეხვედრაში, რომელიც კვირას, 10 აპრილს, დავით აბაშიძის სახელობის სტადიონზე გაიმართება, საფეხბურთო კლუბი ”ზესტაფონი” ჩემპიონობისათვის ბრძოლაში უშუალო კონკურენტ თბილისის საფეხბურთო კლუბ ”დინამოს” უმასპინძლებს, მატჩი 18:00 საათზე დაიწყება ...