ინტერვიუ გია გეგუჩაძესთან.

გეგუჩაძე ხორვატების ბედს შეკრებამდე გადაწყვეტს

საფეხბურთო კლუბმა “ზესტაფონმა”, ეროვნული ჩემპიონატის მეორე ნახევრისთვის მზადება ათ იანვარს განაახლა. სამედიცინო შემოწმების გავლის შემდეგ, გუნდი ზესტაფონში შეიკრიბა და დღეში ორჯერ ვარჯიშობს. იმერულ კლუბში თავის დამკვიდრებას 2 ხორვატი ფეხბურთელი - 24 წლის მცველი, გორან გრუიცა და 23 წლის ნახევარმცველი, მარინ ვუჩემილოვიჩ-გრგიჩი ცდილობს. ზესტაფონელები 25 იანვრამდე საქართველოში მოემზადებიან, ხოლო შემდეგ, ესპანეთში გაემგზავრებიან, სადაც 1-დან 8 თებერვლის ჩათვლით, “მარბელას თასზე” ითამაშებენ. “მსოფლიო სპორტი” გუნდის ამჟამინდელი მდგომარეობით დაინტერესდა და გუნდის მთავარ მწვრთნელს, გია გეგუჩაძეს დაუკავშირდა.

- შვებულებიდან ფეხბურთელები როგორ მდგომარეობაში დაბრუნდნენ?
- თითოეულს ინდივიდუალური დავალება ჰქონდა მიცემული და მათი მდგომარეობა დამაკმაყოფილებელია.

- გუნდში სინჯებზე მყოფი ხორვატი ფეხბურთელები რა შთაბეჭდილებას ტოვებენ?
- ამ ეტაპზე, ძნელი სათქმელია. მათ თაობაზე ყველაფერი რომ გადაწყდება, შთაბეჭდილებაზე მერე ვილაპარაკოთ.

- მათი საკითხი როდის გადაწყდება?
- ესპანეთში შეკრებაზე წასვლამდე.

- ამ ეტაპზე, რომელიმე ქართველი ფეხბურთელი ხომ არ ისინჯება “ზესტაფონში”?
- არავინ  მოსულა.

- ჯაბა დვალმა ვარჯიში განაახლა?
- დვალს სიცხე ჰქონდა და ამიტომ ვერ ვარჯიშობდა. ის გუნდს უკვე შეურთდა.

- სეზონის განახლებამდე, ფეხბურთელების დამატებას თუ გეგმავთ?
- სურვილი გვაქვს, მაგრამ ვერ დავაკონკრეტებ, რადგან მოლაპარაკების პროცესი მიმდინარეობს. გაძლიერება ყველა რგოლში გვჭირდება, მაგრამ ხელმისაწვდომი ფეხბურთელების დეფიციტია. ამ შემთხვევაში ვგულისხმობ, როგორც საქართველოში მოთამაშეებს, ასევე, მის ფარგლებს გარეთ მყოფთ. ხელმისაწვდომობაში მხოლოდ მატერიალური ფაქტორი არ იგულისხმება, ამის გარდა, კიდევ ბევრი რამაა. გაძლიერება არ გვაწყენდა.

- ესპანეთში წასვლამდე, ამხანაგური მატჩების ჩატარებას თუ გეგმავთ?
- პარასკევს, მეორე გუნდი ერთმანეთში ითამაშებს და პირველი გუნდის რამდენიმე ფეხბურთელიც დაემატება. 17 იანვარს ორმხრივს ჩავატარებთ. 23 იანვარიც სათამაშო დღე გვაქვს, მაგრამ ჯერჯერობით სპარინგ-პარტნიორი არ შეგვირჩევია.