სამტრედიელთა სტუმრობა ზემო იმერეთში.

2010 წლის 26 ნოემბერს გაიმართა საქართველოს XXII-ე ეროვნული საფეხბურთო ჩემპიონატის მეთექვსმეტე ტურის მატჩები. "დავით აბაშიძეზე" მორიგი "იმერული დერბი" გაიმართა - ”ზესტაფონმა” საფეხბურთო კლუბ ”სამტრედიას” უმასპინძლა ...

შეხვედრა, რომელიც საფეხბურთო კლუბ "ზესტაფონისთვის" ეროვნულ ჩემპიონატში გამართული 200-ე მატჩი გახლდათ, პირველიდან უკანასკნელ წუთამდე, მასპინძელთა უდიდესი სათამაშო უპირატესობით წარიმართა. პირველი ტაიმი ზესტაფონელი ნიკოლოზ გელაშვილის "ბენეფისად" იქცა - ზემოიმერელთა ფორვარდმა თავის გამოჩენა 20-ე, 42-ე და 45-ე წუთებზე მოახერხა და "ჰეთ-თრიკის" შესრულებასთან ერთად, მეორე ტაიმის წინ, თავის გუნდს უზარმაზარი ფორაც შეუქმნა. აღსანიშნავია, რომ შეხვედრის 33-ე წუთზე სამტრედიელები მოედანზე კაცნაკლულნი დარჩნენ - "ბოლო იმედის" ჯარიმისათვის მატჩის არბიტრმა გიორგი ვადაჭკორიამ სპარტაკ გოგია "გააწითლა".

მეორე ტაიმში სამტრედიელთა რბევა "ზესტაფონის" კიდევ ორმა ფორვარდმა გააგრძელა. 56-ე წუთზე საკუთარ საჯარიმოში ხელით გიორგი ხუმარაშვილმა ითამაშა და თავის გუნდი მოედანზე ცხრა კაცის შემადგენლობით დატოვა, მიმდინარე სეზონში ზესტაფონელთა პირველი 11-მეტრიანი საჯარიმო დარტყმა კი გოლად პირველი ტაიმის "გმირის" ნაცვლად მოედანზე შემოსულმა რატი წინამძღვრიშვილმა აქცია. ამის შემდეგ ჯაბა დვალის ჯერიც დადგა - მან 62-ე და 79-ე წუთებზე გატანილი გოლებით "დუბლი" მიითვალა. ამ უკანასკნელს არც რატი წინამძღვრიშვილი ჩამორჩა და მატჩის 90-ე წუთზე მატჩის საბოლოო ანგარიში დააფიქსირა - 7-0.

საინტერესოა ის გარემოება, რომ დღევანდელ შეხვედრაში მოპოვებული გამარჯვებით ზესტაფონელბმა კლუბის ისტორიაში დაფიქსირებული სარეკორდო ანგარიში გაიმეორეს - 2007 წლის 16 მაისს ასეთივე ანგარიშით დასრულდა მატჩი თელავის "კახეთთან".

მატჩის შემდეგ ( გაზეთი "მსოფლიო სპორტი", www.worldsport.ge):

გია გეგუჩაძე (“ზესტაფონის” მთავარი მწვრთნელი): “თამაში აშკარად ჩვენი უპირატესობით წარიმართა. გაძევებამდეც კარგად გამოგვდიოდა კომბინაციური თამაში. შედეგით კმაყოფილი ვარ”.

გელა სანაია ("სამტრედიის" მთავარი მწვრთნელი): "ვიდეოჩანაწერი არ მინახავს, ამიტომაც ვერაფერს ვიტყვი რამდენად სამართლიანი იყო არბიტრის მოქმედება.  დღევანდელ თამაშზე მეტად მომდევნო ტურის მატჩი მაღელვებს, რომელშიც ორი ცენტრალური მცველის გარეშე მოგვიწევს ასპარეზობა".

	26/11/2010 - ”ზესტაფონი” - ”სამტრედია” 7-0
დაწვრილებით:

საქართველოს XXII-ე ეროვნული ჩემპიონატის მორიგი, 17-ე ტურის შეხვედრას საფეხბურთო კლუბი ”ზესტაფონი” შინ ბოლნისის "სიონთან" 5 დეკემბერს გამართავს. მანამდე, 1 დეკემბერს, იმერლები ეროვნული თასის პირველ მეოთხედფინალურ მატჩში ქვეყნის მოქმედ ჩემპიონ რუსთავის საფეხბურთო კლუბი ”ოლიმპს” უმასპინძლებენ ...