ინტერვიუ კარენ მაკარიანთან.

კარენ მაკარიანი "ზესტაფონიდან" წასვლას არ აპირებს.

კარენ მაკარიანი საფეხბურთო კლუბ ”ზესტაფონში” 2008 წლიდან თამაშობს. ბოლო ხანს პრესაში გავრცელდა ინფორმაცია, რომ ის გუნდს ტოვებს და სომხეთში მიდის სათამაშოდ. ფეხბურთელი აღნიშნულ ინფორმაცია არ ადასტურებს და ამბობს, რომ კლუბში 2013 წლამდე დარჩება. როგორ აპირებს მაკარიანი ძირითადში დაბრუნებას და ითამაშებს თუ არა სომხეთის ნაკრებში? Goli.ge გთავაზობთ კარენ მაკარიანთან ინტერვიუს:

- ბოლო პერიოდში გავრცელდა ხმები, რომ გუნდიდან მიდიხარ და სომხეთის ”დილიჟანში” გადადიხართ. სიმართლეს შეესაბამება ეს ხმები?

- არა, გუნდიდან არსად წასვლას არ ვაპირებ. არ არის ეს მართალი და არც ვიცი, ვის რაში დასჭირდა ამისი დაწერა.

- ”ზესტაფონში” რამდენი ხანი დარჩებით?

- გუნდთან ხუთწლიანი კონტრაქტი მაკავშირებს. 2008 წელს მოვაწერე და 2013 წლამდე აქ ვრჩები.

- რატომ ვერ ხვდებით გუნდის ძირითად შემადგენლობაში, რა არის ამის მიზეზი?

- მიზეზს მხოლოდ ჩემში უნდა ვეძებდე, არ ვარ ისეთ ფორმაში, როგორც ადრე ვიყავი, მაგრამ ვეცდები, რომ მალე დავბრუნდე ძირითად შემადგენლობაში.

- "ვიტ ჯორჯიასთან" სათასო დაპირისპირებაში სასტარტო განაცხადში იყავით, ეს შეხვედრა 4:0 წააგეთ, რა დააკლდა "ზესტაფონს", თქვენ ხომ სერიოზული ფორა გქონდათ?

- ზუსტად ამიტომ წავაგეთ, ძალიან თავდაჯერებულები ვიყავით.

- იყო საუბარი, რომ სომხეთიდან გქონდათ შემოთავაზება, გეთამაშათ სომხეთის ეროვნულ ნაკრებში და სერიოზულ თანხაც სახელდებოდა, მართალია ეს ინფორმაცია?

- კონკრეტული შემოთავაზება არ ყოფილა, იყო უბრალოდ საუბარი ამის შესახებ კულუარებში, პირადად ჩემთან ამაზე არავის უსაუბრია.

- "ზესტაფონის" სტადიონზე ახალი ტექნოლოგიები ინერგება. რაში დაეხმარება ეს ფეხბურთელებს?

- ეს ყველაფერი ხელშემწყობი ფაქტორი იქნება იმისთვის, რომ გავაუმჯობესოთ თამაში.

- ბოლო ტრადიციული კითხვა - იცნობთ თუ არა "Goli.ge" –ს საიტს და თუ სტუმრობთ მას?

- კი ვიცნობ, მაგრამ ხშირად არ შევდივარ ...

- დიდი მადლობა, წარმატებებს გისურვებთ!