გასვლითი მატჩი გაგრელებთან.

2009 წლის 25 ოქტომბერს გაიმართა საქართველოს XXI-ე ეროვნული საფეხბურთო ჩემპიონატის მეთორმეტე ტურის მატჩები. თბილისში, ”ამერის” სტადიონზე, ეროვნული ჩემპიონატის ლიდერი საფეხბურთო კლუბი ”ზესტაფონი” ესტუმრა საფეხბურთო კლუბს ”გაგრას”.

თბილისურ შეხვედრას, სხვა მაყურებელთან ერთად, ”ზესტაფონის” ფან-კლუბის 100-მდე წარმომადგენელიც დაესწრო - ”ზოროებმა” 90 წუთის განმავლობაში მხურვალედ უქომაგეს თავიანთ გუნდს. მატჩის პირველი ნახევარი სტუმართა კარნახით წარიმართა - ანგარიშის გახსნა 23-ე წუთზე თორნიკე აფციაურის უზუსტესი გადაცემის შემდეგ ნიკოლოზ გელაშვილმა მოახერხა. ამის შემდეგ ზესტაფონელებს რამდენიმე ეპიზოდში მართებდათ გოლის გატანა, თუმცა, ტაიმი მარგველთა მხოლოდ მინიმალური უპირატესობით 1-0 დასრულდა.

მეორე ტაიმის დასაწყისში ზესტაფონელებს მიეცათ გაგრელთა კარის აღების დიდებული შანსი, მაგრამ ნიკა გელაშვილმა 11-მეტრიანი საჯარიმო დარტყმის რეალიზება ვერ შეძლო. სტუმრები კვლავაც აგრძელებდნენ სახიფათო მომენტების შექმნას გაგრელთა კართან, მაგრამ პირველი ტაიმის ანგარიში საბოლოოდ აღარ შეცვლილა. ზესტაფონელთა გამარჯვება მინიმალური ანგარიშით 1-0.

მატჩის შემდეგ (www.geosports.ge):

კახაბერ კარანაძე ("გაგრას" მთავარი მწვრთნელი): "ძირითადის ფეხბურთელები გვაკლდა – ხორგუაშვილი, პავლიაშვილი, რაქვიაშვილი, ძალიან ახალგაზრდული შემადგენლობით ვითამაშეთ და ამან იქონია გავლენა. გაბედავა ხშირად მარტო რჩებოდა შეტევაში, ამის მიზეზიც გამოუცდელობაა ფეხბურთელებისა, ვერ ეხმარებიან თავდამსხმელს".

გია გეგუჩაძე ("ზესტაფონის" მთავარი მწვრთნელი): „ძალიან ბევრი კარგი მომენტი შექმნეს ფეხბურთელებმა, მაგრამ მხოლოდ ერთის გამოყენება შეძლო გელაშვილმა. სამწუხაროდ, მანვე ვერ დაარტყა ზუსტად თერთმეტმეტრიანი. იოლი თამაში არ ყოფილა“.

თორნიკე აფციაური („ზესტაფონის“ ფეხბურთელი): „ახალგაზრდული და მებრძოლი გუნდია, ძალიან ბევრს მოძრაობენ. პირველი გოლის შემდეგ, საკმაოდ თავდაჯერებულად ვიგრძენით თავი, პენალტი რომ გამოგვეყენებინა გაცილებით უკეთ წარიმართებოდა შეხვედრა“.

გიორგი გაბედავა („გაგრას“ ფეხბურთელი): „ზესტაფონი“ ძლიერი გუნდია და მასთან ყველას უჭირს თამაში. ვფიქრობ, ლოგიკური შედეგით დასრულდა შეხვედრა, ჩვენ არ მივეცით დიდი ანგარიშით მოგების საშუალება“.

".

	25/10/2009 - ”გაგრა” - ”ზესტაფონი” 0-1
დაწვრილებით:

საქართველოს XXI-ე ეროვნული ჩემპიონატის მეცამეტე ტურის შეხვედრას საფეხბურთო კლუბი ”ზესტაფონი” 30 ოქტომბერს შინ გამართავს. იმერელთა მეტოქე ბოლნისის საფეხბურთო კლუბი ”სიონი ” იქნება ...