რთული გამარჯვება ზუგდიდში.

2009 წლის 29 სექტემბერს გაიმართა საქართველოს XXI-ე ეროვნული საფეხბურთო ჩემპიონატის მეცხრე ტურის მატჩები. ზუგდიდში, გულია თუთბერიძის სახელობის სტადიონზე, საფეხბურთო კლუბი ”ზესტაფონი” დაუპირისპირდა ადგილობრივ საფეხბურთო კლუბს ”ბაიას”.

ზუგდიდში გამართული მატჩის უკვე 3-ე წუთზე სტუმრებმა ანგარიშის გახსნა მოახერხეს - თორნიკე აფციაურის ჩაწოდების შემდეგ მასპინძელთა საჯარიმოში შექმნილი არეულობით ნიკა გელაშვილმა კარგად ისარგებლა და იმერლები დააწინაურა. ტაიმის შუაში მასპინძლებს გათანაბრება შეეძლოთ, მაგრამ რეზო ჯიქიას მიერ საჯარიმოდან სახიფათოდ დარტყმული ბურთი ბრწყინვალე ნახტომში ზურაბ მამალაძემ მოიგერია. საბოლოოდ, ტაიმი ზესტაფონელთა მინიმალური უპირატესობით 0-1 დასრულდა.

მეორე ტაიმში გულია თუთბერიძის სახელობის ზუგდიდის სტადიონის წვიმისაგან დასველებული მინდვრის საფარი ძალიან დამძიმდა, რის გამოც გუნდებს ძალიან უჭირდათ კომბინაციური ფეხბურთის ჩვენება. სახიფათო მომენტები ორივე გუნდის კართან კი იქმნებოდა, თუმცა, პირველი ტაიმის ანგარიში აღარ შეცვლილა ...

მატჩის შემდეგ ( გაზეთი "მსოფლიო სპორტი", www.worldsport.ge):

ბესიკ შეროზია ("ბაიას" მთავარი მწვრთნელი): "იმის მიუხედავად, რომ წავაგეთ, ჩემს ფეხბურთელებს მაინც მადლობა ვუთხარი. თამაშის ხარისხი წინა თამაშებთან შედარებით კარგი იყო. ჩვენმა გუნდმა დაამტკიცა, რომ თამაში ყველასთან შეიძლება. დარწმუნებული ვარ, ”ბაია” მის სიტყვას მომავალში აუცილებლად იტყვის".

გია გეგუჩაძე ("ზესტაფონის" მთავარი მწვრთნელი): "მინდა ავღნიშნო, რომ ძალიან მომეწონა მეტოქის თამაში. ზუგდიდელები კარგ ფეხბურთს თამაშობენ, თუმცა დღეს ჩვენც და მათაც მოედნის საფარმა ძალიან შეგვიშალა ხელი საკუთარი თამაში გვეჩვენებინა. გვიშველა იმან, რომ სწრაფი გოლი გავიტანეთ, თორემ მეორე ტაიმში, როცა მინდორზე ყველაფერი ატალახდა, ამის გაკეთება პრაქტიკულად შეუძლებელი იყო".

	29/09/2009 - - ”ბაია” - ”ზესტაფონი” 0-1
დაწვრილებით:

საქართველოს XXI-ე ეროვნული ჩემპიონატის მეათე ტურის შეხვედრას საფეხბურთო კლუბი ”ზესტაფონი” 3 ოქტომბერს თბილისში გამართავს. იმერელთა მეტოქე მიმდინარე ჩემპიონატის ერთ-ერთი აუტსაიდერი საფეხბურთო კლუბი ”ლოკომოტივი ” იქნება ...