შეკრების დასკვნითი შეხვედრა.

25 ივნისს საფეხბურთო კლუბმა ”ზესტაფონმა” გამართა სლოვენიური შეკრების ბოლო ამხანაგური მატჩი. ზესტაფონელთა მეტოქე ამჯერადაც სლოვენიის ჩემპიონატის წარმომადგენელი, ქვეყნის ვიცე-ჩემპიონი, ქალაქ ნოვა გორიცას საფეხბურთო კლუბი ”გორიცა” გახლდათ...

შეხვედრა, რომელიც ზესტაფონელთა ადგილსამყოფელიდან 70 კილომეტრის მოშორებით მდებარე ქალაქ კრიჟევცის სტადიონზე გაიმართა, 17:30 (თბილისის დროით - 19:30) საათზე დაიწყო. შეხვედრის დაწყებისთანავე ტერიტორიულ უპირატესობას ქართველები დაეუფლნენ და ასე გაგრძელდა მატჩის ოთხმოცდაათივე წუთის მანძილზე. გოლის გატანა გიორგი ხიდეშელს და თორნიკე აფციაურს შეეძლოთ, ხოლო შოთა გრიგალაშვილმა , რომელიც მასპინძელთა მეკარესთან პირისპირ აღმოჩნდა, ბურთი კარს ზემოდან ააცილა. პირველი ტაიმის ბოლოს, მატჩის მიმდინარეობის საწინააღმდეგოდ, 2-ჯერ ხიფათი ზესტაფონელთა კართანაც შეიქმნა, თუმცა ზურაბ მამალაძე ორივე ეპიზოდში საიმედო იყო.

მეორე ტაიმი ისეთივე სცენარით წარიმართა, როგორც პირველი - ზესტაფონელთათვის გამარჯვების მოტანა ზურაბ იონანიძესა და ორჯერ ჯაბა დვალს შეეძლოთ, თუმცა შეტევათა დამაგვირგვინებელ ფაზაში ქართველები დღეს ვერ იყვნენ სათანადო სიმაღლეზე.

ზესტაფონელებმა შემდეგი შემადგენლობით იასპარეზეს: მამალაძე, თოდუა, ხიდეშელი (მაკარიანი, 81), ლობჟანიძე, ელიავა, გორგიაშვილი (დაუშვილი, 46), გრიგალაშვილი (ჭანკოტაძე, 63), აფციაური, ნ.კვასხვაძე (დვალი, 46), ბენაშვილი, გელაშვილი (იონანიძე, 69).

ხვალ ”ზესტაფონი” სამშობლოში ბრუნდება, ხოლო 1 ივლისს ჩარტერული რეისით გუნდი ბელფასტში მიფრინავს, იქიდან კი ქალაქ ლურგანისაკენ (”ლისბერნისა” და ”ზესტაფონის” მატჩი სწორედ ამ ქალაქში, საფეხბურთო კლუბ ”გლენავონის” საშინაო არენა ”მურნევიუ პარკზე” გაიმართება ) აიღებს გეზს ...

	25/06/2009 - ”ზესტაფონი” - ”ჰიტ გორიცა” (ნოვა გორიცა, სლოვენია) 0-0