ინტერვიუ როინ ონიანთან.

უნდა მოვიგოთ!

როინ ონიანი "ზესტაფონში" ერთ-ერთი გამოცდილი ფეხბურთელია და ბუნებრივია, "ვიტ-ჯორჯიასთან" მატჩში მასზე ძალიან ბევრი რამ იქნება დამოკიდებული. თუმცა, გუნდის კაპიტანი იმედით ხვდება ხვალინდელ მატჩს ...

- "ვიტ-ჯორჯიას" უკვე გვარიანად ჩამორჩებით. სატურნირო ცხრილიდან გამომდინარე, ხვალ აუცილებლად უნდა მოიგოთ ...

- ჩვენც კარგად ვიცით, რომ ახლა მხოლოდ მოგება გვჭირდება. გავალთ მოედანზე და ყველაფერს გავაკეთებთ, რაც ჩვენზე იქნება დამოკიდებული. ცუდი ამინდის მიუხედავად, იმედი მაქვს, ქომაგიც მრავლად მოვა სტადიონზე და თავის წვლილს შეიტანს ჩვენს წარმატებაში.

- თუ კვირას ვერ იმარჯვეთ, თქვენი საჩემპიონო შანსები შემცირდება ...

- და ამიტომაც "ვიტ-ჯორჯიასთან" აუცილებლად უნდა მოვიგოთ.

- ეს პირველი საშინაო შეხვედრა იქნება გუნდის ახალი მთავარი მწვრთნელის, გია გეგუჩაძისთვის ...

- იმედია, გეგუჩაძესთან ერთად გუნდს მრავალი საშინაო თუ გასვლითი გამარჯვება ელის და კარგი იქნება, თუ მათ ათვლას სწორედ "ვიტ-ჯორჯიასთან" თამაშით დავიწყებთ.

- მაინც რის ხარჯზე უნდა მოუგოს "ზესტაფონმა" ჩემპიონატის ერთპიროვნულ ლიდერს?

- პირველ რიგში, მაქსიმალურად მობილიზებულები უნდა გავიდეთ მოედანზე და ვეცადოთ, თითოეული შანსი გამოვიყენოთ. ამ შემთხვევაში გამარჯვებას აუცილებლად შევძლებთ.