ინტერვიუ ბექა გოცირიძესთან.

როგორც იქნა !

”ზესტაფონი” მეშვიდე კლუბია, რომელიც საქართველოს თასის მფლობელი გახდა. ოთხი წელი ცდილობდნენ იმერლები საწადელის მიღწევას და ეს 16 მაისს აისრულეს. ზესტაფონელთა გუნდში ერთ-ერთი გამორჩეული იყო თავდამსხმელი ბექა გოცირიძე, რომლის გატანილი გოლიც გადამწყვეტი აღმოჩნდა...

- ეს ”ზესტაფონი”-სთვის პირველი ტიტულია. როგორი იყო თქვენი პირველი რეაქცია ?

- ძალიან დიდი ემოცია იყო. მეოთხედ ვიყავით ფინალში და, როგორც იქნა, გავიმარჯვეთ. ჩვენი გულშემატკივარი უზომოდ გავახარეთ.

- გამარჯვება როგორ აღნიშნეთ ?

- მატჩის შემდეგ ბანკეტი გვქონდა და რესტორანში ცოტა მოვილხინეთ.

- თამაშზე რას იტყვი ?

- ცოტა ჩაკეტილი თამაში იყო, როგორც ფინალებს სჩვევია. ”ამერმაც” კარგად ითამაშა, ღირსეული მეტოქეა. ცოტა გაგვიმართლა კიდეც, მაგრამ, ვფიქრობ, დამსახურებულად გავიმარჯვეთ. ამდენი წაგებული ფინალის შემდეგ, ალბათ, გვექუთვნოდა კიდეც.

- ორივე გუნდიდან ვის გამოარჩევ ?

- ”ამერიდან” ყველამ კარგად ითამაშა, თუმც დიმიტრი ტატანაშვილის გამოსვლის შემდეგ მეტად აგრესიულები გახდნენ. დიმამ გოლიც ლამაზი გაგვიტანა. ჩვენგანაც მიჭირს ვინმეს გამორჩევა, ყველამ თავი დადო მოედანზე, მაგრამ როინ ონიანს მაინც გამოვყოფდი - მართლა გვიკაპიტნა. ონიანის გოლის შემდეგ უფრო გავიხსენით და თავისუფლად ავთამაშდით.

- შენს გოლზე რას იტყვი? არანაკლებ მნიშვნელოვანი გამოდგა ...

- პირადად ჩემთვის პირველი ფინალი იყო და მიხარია, რომ გატანა შევძელი. როგორც შემდეგ აღმოჩნდა, გოლი გამარჯვების იყო და ეს კიდევ უფრო მახარებს.

- საქართველოს თასის მოგებასთან ერთად უეფას თასზე თამაშის უფლებაც მოიპოვეთ ...

- ჩემპიონატში ერთი ტურია დარჩენილი, მერე, ალბათ, ცოტა ხნით დავისვენებთ და უეფას თასისთვის მზადებას სამ კვირაში დავიწყებთ. ვფიქრობ, ”ზესტაფონ”-ს შესწევს იმის ძალა, რომ ორი ეტაპი მაინც გავიაროთ, თუმცა, შევეცდებით მეტიც გავაკეთოთ და არა მარტო ზესტაფონი, არამედ მთელი საქართველო გავახაროთ .

ფოტო საიტიდან www.sportandyouth.ge