ზეიმი ზესტაფონში.

მიმდინარე წლის 16 მაისს საფეხბურთო კლუბმა ”ზესტაფონ”-მა დავით ყიფიანის სახელობის საქართველოს ეროვნული ”ყაზბეგის” თასის გათამაშების ფინალურ მატჩში ანგარიშით 2-1 დაამარცხა თბილისის ”ამერი” და კლუბის ისტორიაში პირველი ტიტულიც დაისაკუთრა .

როგორც მოგეხსენებათ, თასის გათამაშების ფინალურ მატჩს 15 000 -მდე ზესტაფონელი გულშემატკივარი დაესწრო. თასის მფლობელთა დაჯილდოების ცერემონიალის დასრულებისა და საყვარელი გუნდის ბორის პაიჭაძის სახელობის სტადიონიდან ოვაციების თანხლებით გაცილების შემდეგ,მარგველები ზესტაფონისკენ დაიძრნენ.

თბილისიდან დაბრუნებული ზესტაფონელთა ავტობუსების, მიკროავტობუსებისა და ავტომობილების კოლონას ზესტაფონის ქუჩებში ათასობით მოზეიმე ადამიანი შეეგება. ღამის 2-3 საათისათვის მოზეიმეთა დიდი ნაწილი ქალაქის ქუჩებიდან ზესტაფონის ცენტრალური სტადიონისაკენ გამოემართა. ამის მიზეზი საფეხბურთო კლუბ ”ზესტაფონი”-ს ფეხბურთელთა ერთი ნაწილისა და ადმინისტრაციის თბილისიდან ზესტაფონისაკენ გამომგზავრების შესახებ ინფორმაციის გავრცელება გახლდათ. ეროვნული თასით ხელდამშვენებულ ”ზესტაფონელებს”, რომლებიც დილით, დაახლოებით 4:30 საათზე დაბრუნდნენ მშობლიურ ქალაქში, ზესტაფონის ცენტრალურ სტადიონზე 500- მდე ერთგული გულშემატკივარი შეეგება. ფეხბურთელებისა და ფანების შეხვედრა ემოციებითა და სიყვარულით იყო აღსავსე. ზეიმი ზესტაფონში დილის 7 საათამდე გაგრძელდა და მხოლოდ იმისთვის შეწყდა, რომ დღეიდან ახალი ძალით გაგრძელდეს ...

ფოტომასალა მოწოდებულია ირაკლი გორგაძის მიერ