მეტალურგთა ქალაქების ჯახი.

2008 წლის 30 მარტს გაიმართა საქართველოს მეცხრამეტე ეროვნული ჩემპიონატის მეცხრამეტე ტურის მატჩები. საფეხბურთო კლუბი ”ზესტაფონი” რუსთავში ესტუმრა ქვეყნის მოქმედ ჩემპიონს, საფეხბურთო კლუბ ”ოლიმპ”-ს.

ეს გახლდათ ამ მეტოქეების მეოთხე ურთიერთდაპირისპირება მიმდინარე სეზონში. სამივე წინა შეხვედრა ზესტაფონელთა გამარჯვებით დასრულდა, ამდენად, რუსთაველები რევანშის ასაღებად ემზადებოდნენ. თუმცა, მატჩის პირველივე წუთზე მათ ''ცივი შხაპი'' მიიღეს - ჟილვან ვიეირას მარცხენა ფლანგიდან ოსტატური ჩაწოდების მერე ბექა გოცირიძემ ბურთი თავით მასპინძელთა კარის ბადეში გადაგზავნა. საინტერესოა, რომ ბექა გოცირიძის გოლი მატჩის 41-ე წამზე (!) გავიდა, რაც საფეხბურთო კლუბ ”ზესტაფონი”-ს ოთხწლიან ისტორიაში უსწრაფეს გოლად ითვლება... რუსთავის ''ფოლადის'' სტადიონზე შეკრებილმა მაყურებელმა მეორე გოლი პირველი ტაიმის18-ე წუთზე იხილა - ამჯერად მარჯვენა ფლანგიდან მშვენიერი ჩაწოდებით უჩა ლობჟანიძე გამოირჩა, ხოლო მეორე საგოლე ეპიზოდი ჟილვან გომეს ვიეირას ანგარიშზეა. მესამე გოლიც ზესტაფონელთა ბრაზილიელი ლეგიონერის ანგარიშზეა - მეორე ტაიმის დასაწყისში ჟილვან ვიეირა მასპინძელთა საჯარიმოში მარცხენა ფლანგიდან შეიჭრა და რუსთაველთა გოლკიპერ ბექა შეყრილაძეს ახლო კუთხეში გაუტანა.

ზესტაფონელებს ამის შემდეგაც შეექმნათ რამდენიმე კარგი საგოლე შესაძლებლობა, თუმცა სტუმრები შეტევის დაგვირგვინების ფაზაში ვეღარ ყოჩაღობდნენ. მარგველთა დამსახურებული გამარჯვება 3 - 0.

	30/03/2008- ”ოლიმპი” (რუსთავი) - ”ზესტაფონი” 0-3
დაწვრილებით: