ინტერვიუ თემურ მახარაძესთან.

გაძლიერებას კიდევ ვაპირებთ.

საქართველოს ეროვნული ჩემპიონატის ერთ-ერთი ლიდერი ”ზესტაფონი” თბილისშია და მეორე წრისთვის ემზადება. იმერლებმა ერთი შეკრება ბაკურიანში გაიარეს და თბილისში დაბრუნდნენ. ”ზესტაფონი” პირველი წრის შემდეგ რამდენიმე ფეხბურთელმა დატოვა და საინტერესოა, მთავარ მწვრთნელ თემურ მახარაძეს რა გეგმები აქვს სამეორეწრეოდ ...

- ვარჯიში 20 დეკემბერს დავიწყეთ, შემდეგ რამდენიმე დღე საახალწლოდ დავისვენეთ და 5 იანვარს ბაკურიანში წავედით. წვრთნა მთლიანად ფიზიკურ მომზადებას დაეთმო. იქ ერთი კვირა დავყავით და 13 იანვრიდან თბილისში ვართ - დიდუბის მანეჟში ვვარჯიშობთ.

- შესვენებაზე გუნდი რამოდენიმე ფეხბურთელმა დატოვა ...

- კონტრაქტი დაუმთავრდა კახა ჩხეტიანს და წასვლა თავად ითხოვა. მინდა ვთქვა, რომ კახამ ჩვენი გუნდისთვის ძალიან ბევრი რამ გააკეთა და მას ამისთვის მადლობას ვუხდით. გოგი ფიფია ”დნიპრო”-შია, გიორგი ჭელიძე კი თავის გუნდს, მოსკოვის ”ლოკომოტივ”-ს დაუბრუნდა.

- შესაძლოა, გიორგი ჭელიძე დაბრუნდეს ?

- არ ვიცი, წინასწარ ვერაფერს გეტყვით.

- ალბათ, მათ ნაცვლად შევსებას მიიღებთ ...

- ფეხბურთელების დამატებას ვაპირებთ. ჩვენთან ერთად რამდენიმე დღე იყო ბოლნისის ”სიონი”-ს კამერუნელი ფორვარდი ერიკ-რომეო ჩასემი. კლუბები შევთანხმდით, მაგრამ ფეხბურთელმა არარეალური თანხა მოითხოვა და ეს ტრანსფერი ჩაისალა. მალე ბრაზილიიდან დაგვიბრუნდება ედსონ სანტოსი, რომელიც ჩვენი საკუთრებაა. ცხინვალის ”სპარტაკი”-დან დავიბრუნეთ ბახტურიძე, რომელიც ანტალიაში წამოგვყვება. ასევე განათხოვრებულნი, ირაკლი ძარია და დავით ჯანელიძე კი ისევ ”სპარტაკ”-ში დაბრუნდნენ.

- ტესტ-მატჩების გამართვას არ გეგმავთ ?

- დღეს გვინდოდა ”გაგრა”-სთან გვეთამაშა, მაგრამ მოედანი გაყინული იყო და არ მოხერხდა. 18 იანვარს ვგეგმავთ თამაშს ”სპარტაკ”-თან, 20-ში ”სიონ”-თან და 22-ში აზერბაიჯანულ ”სიმურგ”-თან.

- უცხოურ შეკრებაზე როდის მიდიხართ ?

- ანტალიაში 24 იანვარს გავემგვზავრებით .

- პირველი წრის ბოლო ტურის მატჩზეც მინდა გკითხოთ. თბილისის ”დინამო”-მ გაცილებით ძლიერი შთაბეჭდილება დატოვა და ულაპარაკოდ დაგამარცხათ. როგორ ფიქრობთ, რა მოხდა მაშინ?

- ”დინამო”-მ მართლა კარგად ითამაშა, ”ზესტაფონ”-მა კი სეზონში უცუდესი მატჩი გამართა..

- საქართველოს თასის მეოთხედფინალში კი რუსთავის ”ოლიმპ”-ს შეხვდებით ...

- რუსთაველები კარგი სათამაშო პრაქტიკით დაბრუნდებიან საქართველოში. ისინი ხომ ”თანამეგობრობის თასზე” გამოდიან. რამდენადაც ჩემთვის ცნობილია, რამდენიმე უკრაინელი ფეხბურთელი დაუმატებიათ და კარგი გუნდი იქნება. თქმა არ უნდა, მძიმე ბრძოლები გველის.

- თქვენი მიზანი კი ჩემპიონობა და თასია ...

- ბოლომდე ბრძოლას ვაპირებთ. პროგრამა-მინიმუმი ევროთასზე გასვლაა და ვნახოთ ....