ინტერვიუ გიორგი ჭიაბრიშვილთან

მჯერა, ჩემპიონი უძლიერესი გახდება

უკვე საკმაო ხანია, რაც საქართველოს ჩემპიონობისთვის მებრძოლი კლუბების რაოდენობა ორამდე დავიდა - "ზესტაფონს", რომელიც უმაღლეს ლიგას თავიდანვე დამაჯერებლად ლიდერობდა, რუსთავის "მეტალურგი" სამი ქულის დისტანციამდე წამოეწია.

10 აპრილს, 18:00 სთ-ზე, ზესტაფონში, ეს გუნდები ერთმანეთს საქართველოს თასის ნახევარფინალში დაუპირისპირდებიან.

ზესტაფონელთა და რუსთაველთა ურთიერთშეხვედრებს დიდი ისტორია აქვს, მიმდინარე ჩემპიონატში კი ისინი უკვე სამჯერ შეხვდნენ ერთმანეთს. "ზესტაფონმა" შინ ჯერ 2:0, შემდეგ კი 2:1 მოიგო, შუალედში კი რუსთავში გამართული მატჩი 0:0 დასრულდა.

ამ სეზონში "ზესტაფონსა" და "მეტალურგს" შორის კიდევ სამი საინტერესო ბრძოლა გველის.

10 აპრილს გასამართი შეხვედრის წინ "ზესტაფონის" მთავარ მწვრთნელ გიორგი ჭიაბრიშვილს ვესაუბრეთ და, ბუნებრივია, სათასო ბატალიების პარალელურად, გვერდი არც ჩემპიონატს ავუარეთ.

- ჩვენი მიზანი სამივე ქართული ტიტულის მოპოვება იყო და ეს ამოცანა უცვლელია. ვიბრძვით ჩემპიონობისთვის, თასისა და სუპერთასისთვის, შესაბამისად, "მეტალურგთან" მხოლოდ გამარჯვებისთვის ვიბრძოლებთ. იდეალური, რა თქმა უნდა, შინ მოგება და გოლის არგაშვება იქნება.

- ჩემპიონატის მეორე ეტაპის დაწყებამდე, სანამ აუტსაიდერებთან მოპოვებული ქულები ჩამოგაკლდებოდათ, ალბათ, ვერ წარმოიდგენდით, რომ "მეტალურგი" ჩემპიონობისთვის ბრძოლაში თქვენი უმთავრესი კონკურენტი გახდებოდა.
- ჩემპიონატის სისტემაზე ჩემი აზრი არაერთხელ დამიფიქსირებია და ახლაც ვიმეორებ, რომ ჩემი გუნდის საქმე არის ფეხბურთი და არა - მათემატიკური გამოთვლები. თუ ვინმემ ეს სისტემა სათავისოდ გამოიყენა, ეს მისი საქმეა, ჩვენ კი ყველა მატჩში გამარჯვებისთვის ვიბრძვით.

ჩვენთვის არ არსებობს პირველხარისხოვანი და მეორეხარისხოვანი შეხვედრები. თუ ვინმემ აუტსაიდერებთან ქულების დაკარგვა წინასწარ დაგეგმა, რა გარანტია ჰქონდა, რომ მაინცდამაინც ის გუნდები ვერ მოხვდებოდნენ პლეი ოფში? ერთი სიტყვით, ეს თემა ჩვენთვის საინტერესო არ არის, ვალდებულნი ვართ, რეალობას თვალი გავუსწოროთ და "მეტალურგს" ორივე ფრონტზე ვებრძოლოთ. ნამდვილად ძლიერი კონკურენტია, თუმცა თავიდან ველოდით, რომ ჩემპიონობისთვის ბრძოლა "დინამოსა" და "ტორპედოსთან" მოგვიწევდა.

- ზუგდიდში დაკარგული ქულებისა და შინ "დილასთან" განცდილი მარცხის შემდეგ, შეგვიძლია ვთქვათ, რომ "ზესტაფონს" გარკვეული ჩავარდნა დაეწყო?
- სეზონს ერთ დონეზე ვერავინ ჩაატარებს, თუმცა ჩემი გუნდის თამაშის ხარისხით უკმაყოფილო არც ბოლო პერიოდში ვარ. ყოფილა შემთხვევები, როცა არცთუ კარგად გვითამაშია და მოგვიგია, "დილას" კი პირიქით, თამაშით ვაჯობეთ, მაგრამ უამრავი საგოლე მომენტი ვერ გამოვიყენეთ და დავისაჯეთ. მთავარი შედეგია და, აქედან გამომდინარე, უნდა ვთქვა, რომ არცთუ საუკეთესო პერიოდი გვიდგას.

- "მეტალურგს" უკვე სამი ქულითღა უსწრებთ. ყოველივე ეს ფეხბურთელთა შორის გარკვეულ შფოთვას ხომ არ იწვევს?
- "ზესტაფონის" სამწვრთნელო შტაბი ყველანაირად ცდილობს, რომ ბიჭებს დაძაბულობა მოუხსნას და საკუთარი ძალების რწმენა შეუნარჩუნოს. ვფიქრობ, ეს კარგად გამოგვდის.

შეიძლება, ბევრი ელოდა, რომ "ზესტაფონი" ჩემპიონობას ნაადრევად გაინაღდებდა, მაგრამ რეალობა სხვაგვარია და სიტუაციის მიხედვით უნდა ვიმოქმედოთ. მჯერა, ჩემპიონი უძლიერესი გახდება, მძიმე ბრძოლაში მოპოვებული ოქროს მედლები კი უკვალოდ არ ჩაივლის და მიღებული გამოცდილება ევროტურნირებზე დიდ სამსახურს გაგვიწევს.

- "დილასთან" მატჩში "ზესტაფონის" შემადგენლობაში დებიუტი ჰქონდა აბაიომი ოვონიკოკოს...
- მძიმე ტრავმის შემდეგ, მან მოედანზე დასაბრუნებლად დიდი შრომა გასწია და სამაგიეროსაც სულ მალე მიიღებს. მისი დიდი იმედი გვაქვს და დარწმუნებული ვარ, უახლოეს პერიოდში "ზესტაფონისთვის" მეტად მნიშვნელოვანი ფეხბურთელი იქნება.

- "ზესტაფონი" და "მეტალურგი" ერთმანეთს ძალიან კარგად იცნობენ. შეიძლება, ამან მათი შეხვედრების სანახაობრივ მხარეზე უარყოფითად იმოქმედოს?
- არა მგონია, ასე მოხდეს, თუნდაც იმიტომ, რომ ნებისმიერი მწვრთნელი ყოველთვის ცდილობს, მოიფიქროს რაღაც ახალი, რითაც მოწინააღმდეგეზე უპირატესობას მოიპოვებს.

- შეგიძლიათ თქვათ, რომ "ზესტაფონი" სეზონის გადამწყვეტი მატჩებისთვის ასი პროცენტით მზადაა?
- ამაში აბსოლუტურად დარწმუნებული ვარ. მოხარული ვარ, რომ პლეი ოფში მოხვედრილი ყველა გუნდი, მათ შორის ისინიც, ვისაც ევროტურნირებზე გასვლის შანსი არ აქვთ, ბოლომდე იბრძვიან. მათი დამარცხება იოლი ნამდვილად არ იქნება, მაგრამ ვალდებულები ვართ, დავამტკიცოთ, რომ ჩემპიონობისა და თასის მოპოვების ღირსნი ვართ. ეს ჩემთვის, როგორც ახალგაზრდა მწვრნელისთვისაც დიდი გამოწვევაა.

კლუბის ხელმძღვანელობამ გამოუცდელ ადამიანს ამხელა პასუხისმგებლობა დამაკისრა და ვალდებული ვარ, მისი და გულშემატკივრების ნდობა გავამართლო.